Vísitala leiguverðs á höfuðborgarsvæðinu mældist 124,5 stig og hækkaði um 1,38 prósent á milli mánaða í júlí. Vísitalan hækkaði um 5,15 prósent á milli júlímánaða 2024 og 2025, á sama tíma og verðbólga mældist 4 prósent og vísitala íbúðaverðs hækkaði um 4,2 prósent.

Hægst hefur á tólf mánaða hækkun vísitölu leiguverðs á síðustu mánuðum, en vísitalan hækkaði um 5,77 prósent á milli júnímánaða 2024 og 2025. Í maí nam tólf mánaða hækkun vísitölunnar 8,8 prósentum.

Hægt er að nálgast mælaborð fyrir vísitölur HMS með því að smella á hnappinn hér að neðan.

Á meðfylgjandi mynd má sjá mánaðarlega breytingu á vísitölu leiguverðs ásamt gildum hennar síðustu 12 mánuði.

Vísitala leiguverðs byggir á vegnu meðaltali leiguverðs á fermetra hjá hefðbundnum íbúðum í eigu einstaklinga og hagnaðardrifinna leigufélaga. Niðurstöður eru vegnar saman með veltu íbúða með sama herbergjafjölda á síðustu 12 mánuðum. Stuðst er við leigusamninga síðastliðinna tveggja mánaða við útreikning vísitölunnar, svo júlígildi hennar tekur mið af leigusamningum í júní og júlí.

Raun­verðs­hækk­un leigu­verðs á árs­grund­velli á nið­ur­leið

Raunverðshækkun vísitölu leiguverðs á ársgrundvelli nam 1,1 prósenti í júlí en til samanburðar hækkaði leiguverð um 1,5 prósent að raunvirði í júní og 4,9 prósent í maí. Myndin hér að neðan sýnir raunverðsþróun vísitölu leiguverðs en á síðustu mánuðum hafa raunverðshækkanir leiguverðs á ársgrundvelli verið á niðurleið. Tólf mánaða breyting vísitölunnar á föstu verðlagi hefur ekki verið lægri í um það bil tvö ár.

Hægt er að nálgast upplýsingar um leigusamninga í leiguverðsjá HMS, en hana má nálgast með því að smella á þennan hlekk.