Leiguverðsjá
Leiguverðsjá
Leiguverðsjá HMS notast við upplýsingar úr skráðum leigusamningum í leiguskrá og uppfærist mælaborðið í samræmi við hana, en þó þannig að gögn fyrir hvern mánuð birtast á fyrsta miðvikudegi næsta mánaðar. Mælaborðið birtir upplýsingar um nýskráða leigusamninga eftir upphafsdegi og áætlað leiguverð gildra leigusamninga sem HMS telur nothæfa til tölfræðivinnslu og tóku gildi í síðasta lagi í síðastliðnum mánuði.
Upphafsdagur er sú dagsetning sem leigusamningur tekur gildi. Frá og með þeim degi er leiga greidd og leigjandi hefur aðgang að leiguhúsnæðinu.
Notendur geta valið landssvæði, sveitarfélag og póstnúmer leigueigna, fjölda herbergja og flatarmáls samnings auk aldursflokkunar leiguhúsnæðis. Einnig geta notendur síað leigusamninga eftir tegund leigusala og eftir því hvort samningar séu tímabundnir eða ekki. Verðsjáin inniheldur upplýsingar um meðaltal fermetraverðs nýrra leigusamninga og gildra leigusamninga.
Leiguverð gildra leigusamninga er stöðugt út leigutímann fyrir samninga sem ekki eru vísitölutengdir, hins vegar er leiguverð vísitölutengdra leigusamninga uppreiknað mánaðarlega í samræmi við vísitölu neysluverðs.
HMS síar út alla samninga sem hafa flatarmál undir 20 fermetrum og yfir 500 fermetrum. Sömuleiðis eru samningar með leiguverð á fermetra undir 500 krónum eða yfir 10 þúsund krónum síaðir út, auk samninga með heildarleiguverð undir 10 þúsund krónum og yfir 2,5 milljónum króna.
Enn fremur tekur leiguverðsjá einungis til leigusamninga þar sem heildarflatarmál gildra leigusamninga á tiltekna leigueiningu á hverjum tíma rúmast innan skráðs flatarmáls leigueiningarinnar samkvæmt fasteignaskrá. Í því samhengi eru nýrri samningar teknir fram yfir eldri samninga. Jafnframt tekur leiguverðsjá einungis til nýjasta samnings sem tiltekinn leigjandi gerir um tiltekna leigueiningu á hverjum tíma í þeim tilvikum þar sem fleiri en einn samningur er í gildi.
Leiguverðsjá síar út samninga þar sem meira en 5 ár eru liðin frá upphafsdegi samnings eða síðustu breytingu á samningi.
Aldursflokkun leiguhúsnæðis miðast við aldur húsnæðisins á hverjum tíma.
Notkunarleiðbeiningar
Hægt er að velja mörg sveitarfélög, póstnúmer eða aðrar flokkanir með því að halda inni ctrl (apple: command) takkanum og velja það sem þarf.
Til þess að hala niður gögnunum á bak við mælaborðið þarf að smella hvar sem er á grafið á mælaborðinu, velja punktana þrjá efst í hægra horninu og smella á „Export data“. Einnig er hægt að hala niður gögnum í gegnum flipann „Gögn til niðurhals“ á mælaborðinu.
Fyrirvari
Leiguskrá HMS er í stöðugri uppfærslu og getur uppfærst afturvirkt ef eldri samningar eru skráðir.