Vísitala íbúðaverðs mældist 111,7 stig í júlí og hækkaði um 0,27 prósent á milli mánaða. Á undanförnum tólf mánuðum hefur vísitalan hækkað um 4,2 prósent, á sama tíma og verðbólga mældist 4 prósent.

Áfram hægist því á raunverðshækkun íbúðaverðs sem er þó enn jákvæð og mælist nú 0,18 prósent samanborið við 0,52 prósent í júní og 1,87 prósent í maí.

Á mynd hér að neðan má sjá mánaðarbreytingu vísitölu íbúðaverðs á síðustu mánuðum.

Taflan hér að neðan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Íbúða­verð lækk­aði lít­il­lega að raun­virði á höf­uð­borg­ar­svæð­inu

Vísitala íbúðaverðs á höfuðborgarsvæðinu stóð í stað milli mánaða. Að raunvirði hefur íbúðaverð því lækkað um 0,16 prósent á síðastliðnum tólf mánuðum, en ársbreytingin mælist nú neikvæð í fyrsta skipti síðan í mars 2024. Munar þar mestu um fjölbýlisíbúðir sem hafa lækkað um 0,59 prósent að raunvirði á sama tíma og sérbýlisíbúðir hækkuðum um 0,36 prósent.

Á landsbyggðinni mælist tólf mánaða raunbreyting vísitölu íbúðaverðs 0,80 prósent. Þar af hafa fjölbýlisíbúðir lækkað um 1,95 prósent á sama tíma og sérbýlisíbúðir hafa hækkað um 1,89 prósent.

Mæla­­­­­borð fyr­­­­­­ir vísi­­­­­­töl­­­­­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð.

Einnig sýnir mælaborðið undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri vísitölu íbúðaverðs og tekur gildið 100 í janúar 2024.