Hlutverk Húsnæðis- og mannvirkjastofnunar er að vernda líf og heilsu manna, eignir og umhverfi með því að tryggja faglegan undirbúning mannvirkjagerðar og virkt eftirlit með gæðum, öryggi og heilnæmi. Að stuðla að stöðugleika á húsnæðismarkaði og tryggja almenningi aðgengi...

Húsnæðis- og mannvirkjastofnun

Fræðsla og forvarnir

Gögn og mælaborð

Brunavarnir

Byggingarreglugerð

Byggingarvörur

Fagaðilar í mannvirkjagerð

Fasteignaskrá

Húsnæðisáætlanir

Húsnæðisbætur og leigumál

Landeignaskrá

Lán til einstaklinga

Lán til lögaðila

Lífsferilsgreining (LCA)

Mannvirkjarannsóknasjóður - Askur

Mannvirkjaskrá

Markaðseftirlit

Rafmagnsöryggi

Stofnframlög

Þjónustuflokkar

Húsnæðisbætur

Lánavefur

Öryggi mannvirkja

Sveitarfélagsgátt

Um HMS

Fréttir

Gjaldskrá HMS

Lög og reglugerðir

Umsóknir og eyðublöð

Útgefið efni

Vaxtatafla

Brák íbúðafélag hefur fengið samþykkta umsókn um úthlutun stofnframlags úr fyrstu úthlutun ársins 2025, til byggingar á nýju leiguhúsnæði á Dalvík. Um er að ræða 12 íbúða fjölbýlishús á tveimur hæðum, búið utan á liggjandi lyftu. Íbúðirnar verða sérstaklega ætlaðar öldruðu fólki. Er um að ræða annað verkefnið sem fær samþykkt veitingu stofnframlaga í Dalvíkurbyggð, en áður hefur verið byggður íbúðakjarni með sjö íbúðum fyrir fatlað fólk á Dalvík með aðstoð stofnframlaga. 

Samþykkt var að leggja verkefninu til stofnframlag frá ríkinu auk sérstaks byggðaframlags sem ætlað er að styðja við að húsnæðisuppbygging á landsbyggðinni sé í samræmi við þörf. Dalvíkurbyggð hefur sömuleiðis samþykkt að veita stofnframlag til verkefnisins. 

Brák íbúðafélag er rekið án hagnaðarsjónarmiða og hefur það að markmiði að tryggja tekjulægri einstaklingum og fjölskyldum öruggt og langtímaleigt húsnæði. Hlutverk Brákar er að byggja eða kaupa íbúðir fyrir tekju- og eignaminni heimili og sjá um rekstur og viðhald þeirra eigna. Í dag eru 35 sveitarfélög aðilar að Brák og rúmlega 300 íbúðir annað hvort komnar í útleigu eða í undirbúningi. 

Verkefnið er hluti af Tryggð byggð - samstarfsvettvangi um húsnæðisuppbyggingu á landsbyggðinni. 

Samþykkt stofnframlag til nýrra leiguíbúða fyrir aldraða á Dalvík 

Félags- og húsnæðismálaráðuneytið hefur gert breytingu á reglugerð um húsnæðisbætur sem felur í sér hækkun á frítekjumörkum vegna árlegra tekna. Frá og með 1. september 2025 munu hærri frítekjumörk gilda við útreikning húsnæðisbóta.

 Endurreikningur húsnæðisbóta fer fram um miðjan septembermánuð. Umsækjendur fá bréf á island.is með niðurstöðum endurreiknings ef breyting hefur orðið á bótarétti frá síðustu tekjuáætlun.  

 Eftir breytingarnar verða frítekjumörkin eftirfarandi miðað við árstekjur:

Fjöldi heimilismanna|Frítekjumörk fyrir breytingar|Frítekjumörk eftir breytingar

Fyrsta greiðsla húsnæðisbóta eftir þessar breytingar verður 1. október næstkomandi fyrir septembermánuð. Markmiðið með breytingunni er að koma til móts við þær breytingar sem verða á örorku- og endurhæfingargreiðslum frá 1. september 2025.

Hækkun frítekjumarka húsnæðisbóta frá 1. september 2025

Áætlað er að íbúum í Hafnarfjarðarbæ muni fjölga um 5.549 manns á næstu 5 árum, sem er fjölgun um 17,6 prósent.

Uppbygging dregst saman en er enn yfir meðaltali síðastliðins áratugs.

Úthlutunaráætlun sveitarfélagsins gefur til kynna að nægt framboð verði á lóðum til að mæta íbúðaþörf á næstu árum.

Hafnarfjarðarkaupstaður hefur staðfest endurskoðaða húsnæðisáætlun fyrir árið 2025. Samkvæmt áætluninni er gert ráð fyrir að íbúum sveitarfélagsins muni fjölga um 5.549 manns (18%) á næstu 5 árum og 9.407 manns (30%) á næstu tíu árum. Til samanburðar hefur íbúum fjölgað um nærri 9% á síðustu 5 árum og um 15% á síðastliðnum 10 árum.

Húsnæðisáætlun ársins 2024 ofmat fólksfjölgunina það ár um 591 manns, eða 39%. Þrátt fyrir það reyndist fjölgunin sú mesta í yfir 15 ár. Endurskoðuð áætlun fyrir árið 2025 gerir þó ráð fyrir enn meiri fjölgun í ár heldur en fyrri áætlun gerði ráð fyrir. Á móti hefur spá um fólksfjölgun á komandi árum verið lækkuð verulega og því er gert ráð fyrir hægari og minni fjölgun til lengri tíma litið.

Samkvæmt endurskoðaðri húsnæðisáætlun er gert ráð fyrir að þörf verði fyrir um 490 nýjar íbúðir á ári að meðaltali næstu tíu árin, sem jafngildir 2.650 íbúðum á næstu fimm árum og alls 4.903 íbúðum yfir tíu ára tímabil. Til samanburðar hefur árleg fjölgun íbúða í Hafnarfirði verið um 292 íbúðir á ári á síðustu fimm árum og að meðaltali og 204 íbúðir á ári síðastliðin tíu ár. Ný spá gerir hins vegar ráð fyrir minnkandi þörf fyrir nýjar íbúðir á síðari hluta spátímabilsins.

Íbúðauppbygging í samræmi við þörf

Samkvæmt talningu HMS voru 1.088 íbúðir í byggingu í mars 2025. Það voru um 27 prósent færri íbúðir en á sama tíma í fyrra og 36 prósent færri en á sama tíma fyrir tveimur árum. Á myndinni hér að neðan má sjá að flestar íbúðir í byggingu voru á stigum 3 til 5. Stig 3 vísar til þess að burðarvirki hússins er risið, stig 4 til þess að mannvirkið sé fokhelt og stig 5 að það sé tilbúið til innréttinga.

Fjöldi íbúða sem teljast í byggingu dugir til að mæta þeirri íbúðaþörf sem sveitarfélagið áætlar að verði á næstu tveimur árum. Talsverð uppbygging hefur átt sér stað í sveitarfélaginu á síðustu árum, sem náði hápunkti í mars 2023 þegar fjöldi íbúða í byggingu tvöfaldaðist á milli ára. Hins vegar má sjá á myndinni hér fyrir neðan að hægst hefur talsvert á uppbyggingu síðan hápunktinum var náð.

Áherslur Hafnarfjarðarbæjar í húsnæðismálum

Hafnarfjarðarbær leggur ríka áherslu á að skapa fjölbreytt og aðlaðandi búsetuskilyrði í nýjum og núverandi hverfum bæjarins. Eitt af meginmarkmiðum sveitarfélagsins er að tryggja fjölbreytt framboð húsagerða í nýjum íbúðahverfum, þannig að þau endurspegli ólíkar þarfir íbúa og stuðli að fjölbreyttu mannlífi. Í allri skipulagningu er þess gætt að úthlutun lóða geri ráð fyrir fjölbreyttum húsagerðum og að hlutfall þeirra taki mið af eftirspurn hverju sinni.

Ný íbúðahverfi Hafnarfjarðar eru skipulögð á suðausturjaðri bæjarins og tengjast við núverandi byggð, einkum hverfin á Völlum og Áslandi. Uppbyggingin kallar á markvissa þróun grunnþátta eins og skóla, leikskóla, samgönguinnviða og gatnakerfis. Þar gegnir Ásvallabraut lykilhlutverki sem ný tengibraut milli hverfa og er talið brýnt að ljúka tvöföldun Reykjanesbrautar í gegnum bæinn til að styrkja tengingar og bæta umferðarflæði.

Lóðaframboð í Hafnarfirði í takt við íbúðaþörf næstu ára

Hafnarfjarðarkaupstaður hefur nú skipulagt lóðir fyrir 4.439 íbúðir til úthlutunar á næstu fimm árum og alls 6.519 íbúðir til næstu tíu ára, sem samsvarar að meðaltali 651 íbúð á ári. Áætluð íbúðaþörf á sama tímabili gerir sem fyrr segir ráð fyrir um 490 íbúðum á ári.

Á næstu tveimur árum er gert ráð fyrir að þörfjin verði rúmlega 1.118 íbúðir og ætti fyrirhugað lóðaframboð að duga vel til að mæta þörf fyrir nýjar íbúðir í Hafnarfirði, að því gefnu að úthlutunaráætlanir sveitarfélagsins gangi eftir.

Uppbygging í takt við þörf: Hægir á vexti í Hafnarfirði

Fjöldi húseigna á Íslandi eru vantryggðar komi til brunatjóns sökum of lágs brunabótamats þar sem húseigendur óska ekki eftir endurmati

Húseigendur virðast ekki nægilega upplýstir um að óska eftir endurmati brunabótamats 

Fyrir flest heimili er húseignin langstærsta fjárfestingin og því er mikið undir að vera með húseignina rétt tryggða 

Fjöldi húseigna á Íslandi eru vantryggðar komi til brunatjóns sökum of lágs brunabótamats að mati HMS. Heilt yfir megi gera ráð fyrir að brunabótamat húsnæðis á Íslandi sé vanmetið um 4-8%, vegna skorts á endurmati í kjölfar viðhalds og framkvæmda. Í sumum tilfellum er vanmatið mun meira, til dæmis ef um er að ræða eldri hús og einbýli. Þar er ekki óvenjulegt að brunabótamatið sé tugmilljónum króna of lágt.

Húseigendur virðast almennt ekki upplýstir um að þeir þurfi sjálfir að óska eftir endurmati brunabótamats í kjölfar framkvæmda. Ef farið er í stærri framkvæmdir þar sem heilum byggingarhlutum er skipt út eða einhverju bætt við eignina getur verið ástæða til að endurmeta brunabótamatið. Þetta hefur áhrif á vátryggingarverðmæti hússins og fæst ekki bætt nema óskað hafi verið eftir nýju brunabótamati. Telji húseigendur að brunabótamat sé vanmetið er hægt að sækja um endurmat. Nánar um endurmat brunabótamats. 

Vegvísir um bætta framkvæmd brunabótamats 

HMS stóð fyrir opnum fundi í morgun þar sem nýr vegvísir um bætta framkvæmd brunabótamats var kynntur. Tryggvi Már Ingvarsson, framkvæmdastjóri fasteignasviðs HMS kynnti niðurstöður greiningar stofnunarinnar og þá fjallaði Guðný Helga Herbertsdóttir, forstjóri VÍS, um brunatryggingar og brunatjón sem nemur milljörðum króna árlega en hún fagnaði framtaki HMS að taka brunabótamatið til endurskoðunar. 

Daði Már Kristófersson, fjármála- og efnahagsráðherra, ávarpaði einnig fundinn og sagði hann brunabótamat vera afar gamalt fyrirbæri í íslensku samfélagi en um leið mikilvægan hluta af innviðum landsins. „Það þarf að halda brunabótamatinu við rétt eins og öðrum innviðum. Með aukinni velmegun hafa húsin stækkað og meðvitund fólks um áhættuþættina líka aukist. Um brunabótamatið gilda skýrar reglur en þær hafa ekki alveg fylgt nútímanum. Fólk er almennt ekki meðvitað um að tilkynna uppfærslur á húsnæði sínu og það er mjög jákvætt frumkvæði, sem HMS er að sýna, að vekja fólk til umhugsunar hvort það sé að fullu tryggt. Þetta er vegferð sem við förum í sameiginlega, HMS og ríkisstjórnin. Við munum hugsanlega skoða einhverjar breytingar á lagaumgjörðinni til viðbótar við að fólk óski eftir endurmati hjá HMS. En fyrsta skrefið er að benda fólki á að það sé mögulega vantryggt.“ 

Að mati HMS er brýnt að á næstu misserum verði lögð áhersla á að endurskoða umhverfi brunabótamats með yfirferð laga og reglugerða, endurgera tækniumhverfið sem notað er við framkvæmdina en umfram allt stuðla að vitundarvakningu meðal almennings um mikilvægi þess að brunavirði húseigna sé sem réttast.  

Hér á eftir eru þau átta verkefni sem HMS hyggst leggja áherslu á til að bregðast við og þróa málaflokkinn áfram. 

Fjöldi húseigna vantryggðar á Íslandi 

HMS boðar til opins fundar fimmtudaginn 26. júní klukkan 9:00. Tilefni fundarins er útgáfa Vegvísis að brunabótamati 2025 - bætt framkvæmd brunabótamats. Fundurinn verður haldinn í húsakynnum HMS í Borgartúni 21 en einnig verður hægt að fylgjast með fundinum í streymi.

HMS tók yfir málaflokk brunabótamats árið 2022 og er tilgangur Vegvísisins um bætt brunabótamat að fara yfir þá reynslu og þekkingu sem HMS hefur öðlast, stöðu brunabótamats á Íslandi, samfélagslegt mikilvægi þess, lærdóminn af endurmati brunabótamats í Grindavík og áhrif brunabótamats á tekjur ríkissjóðs. 

Auk HMS munu Daði Már Kristófersson, fjármála- og efnahagsráðherra  og Guðný Helga Herbertsdóttir, forstjóri VÍS vera með erindi.

Daði Már Kristófersson, fjármála- og efnahagsráðherra 

Tryggvi Már Ingvarsson, framkvæmdastjóri fasteigna HMS 

Guðný Helga Herbertsdóttir, forstjóri VÍS 

Fundarstjóri: Anna Guðmunda Ingvarsdóttir, aðstoðarforstjóri HMS 

Fundur um bætta framkvæmd brunabótamats og útgáfu vegvísis

Stofnframlögin eru veitt til samfélagssinnaðra leigusala til að byggja eða kaupa almennar leiguíbúðir fyrir tekju- og eignaminni heimili.

Umsóknarfrestur er til og með 11. júlí næstkomandi.

Stofnframlög hafa verið veitt til uppbyggingar á rúmlega 4.000 íbúðum

Frá árinu 2016 þegar lög um almennar íbúðir tóku gildi hafa stjórnvöld, ríki og sveitarfélög úthlutað stofnframlögum upp á um 49 milljarða króna til uppbyggingar á 4.051 leiguíbúð víðsvegar um landið.

Stofnframlög eru stuðningur í formi eiginfjár sem veitt eru annars vegar fyrir hönd ríkisins í gegnum HMS og hins vegar frá viðkomandi sveitarfélagi þar sem íbúðirnar koma til með að vera staðsettar í.

Markmiðið með stofnframlögum er að fjölga hagkvæmum leiguíbúðum með viðráðanlegan húsnæðiskostnað og bæta húsnæðisöryggi tekju- og eignaminni heimila. Húsnæðiskostnaður á að vera í samræmi við greiðslugetu og að jafnaði ekki umfram fjórðung tekna.

Það eru ýmsar kröfur gerðar til almennra íbúða, sem eru byggðar eða keyptar með stofnframlögum. Þær þurfa að uppfylla skilyrði um hagkvæmni, til að mynda stærðarmörk með tilliti til fjölda svefnherbergja. Þessi umgjörð er til þess fallin að lækka leiguverð og skapa aukið húsnæðisöryggi tekju-og eignaminni heimila.

Fyrirspurnir beinast á stofnframlag@hms.is

Opnað hefur verið fyrir umsóknir um stofnframlög

Mannfjöldaspár sveitarfélaganna rættust að mestu leyti og fólksfjölgun á árinu 2024 einungis 214 manns minni en spár sem er mismunur upp á um 2,6%.

Færri íbúðir voru byggðar í fyrra heldur en áætlað var að þörf væri fyrir.

Langir biðlistar eftir íbúðum með viðráðanlegan húsnæðiskostnað.

Húsnæðis- og mannvirkjastofnun hefur tekið saman helstu niðurstöður húsnæðisáætlana fyrir árið 2024 og borið þær saman við birtar rauntölur. Samantektina og árangur má finna í nýútgefinni skýrslu. 

Fólksfjölgun nánast í samræmi við spár

Ekki náðist að byggja nægilega margar íbúðir í fyrra til þess að uppfylla áætlaða íbúðaþörf fyrir árið 2024, samkvæmt húsnæðisáætlunum sveitarfélaganna og rauntölum ársins. Spár sveitarfélaganna um þróun mannfjölda reyndust í heild nokkuð réttar, en á sumum svæðum raungerðist mun meiri fólksfjölgun heldur en búist var við eins og til að mynda í Garðabæ, á meðan ofmat var á vexti í öðrum sveitarfélögum eins og Reykjavíkurborg og Kópavogsbæ. Mismunur á spám og raunfjölgun reyndist að lokum vera ofmat um 2,6% sem telur 214 manns.

Ekki náðist að klára að byggja nógu margar íbúðir

Sveitarfélögin áætluðu að þörf væri fyrir rúmlega 4.000 nýjar íbúðir árið 2024, en 3.665 íbúðir voru fullbyggðar á árinu. Fjölgun íbúða var á sumum svæðum meiri heldur en áætlað að þörf væri fyrir og má þar nefna sveitarfélög eins og Sveitarfélagið Árborg og Hvalfjarðarsveit. Uppbygging nýrra íbúða var nokkuð undir áætlaðri þörf á höfuðborgarsvæðinu og þá helst í Hafnarfjarðarkaupstað og Reykjavíkurborg, en í þeim sveitarfélögum voru byggðar rúmlega 300 íbúðum færra heldur en metið var að væri þörf fyrir.

Myndskýring: Blái liturinn sýnir svæði þar sem fleiri íbúðir voru byggðar en áætlað var en rauði liturinn táknar svæði þar sem uppbygging var undir áætlaðri þörf. Því dekkri sem liturinn er, þeim mun meiri var frávikið frá áætlun. Hvítur litur táknar sveitarfélög sem ekki skiluðu inn húsnæðisáætlun. (Heimild: Húsnæðisáætlanir 2024)

Eftirspurn eftir félagslegum úrræðum er mikil. Um 11.700 félagsleg úrræði eru í notkun á landsvísu, skv. húsnæðisáætlunum, en samtals bíða um 7.200 manns eftir slíkum búsetuúrræðum og þar af rúmlega 5.900 manns á höfuðborgarsvæðinu.

Samantektin dregur fram nauðsyn þess að sveitarfélög samræmi áætlanir sínar og líti til heildarsvæða við stefnumótun sína í húsnæðismálum og skipulagningu á framtíðar uppbyggingu íbúðarhúsnæðis, sérstaklega þar sem mörg sveitarfélög deila sama atvinnusvæði.

Endurskoðun húsnæðisáætlana fyrir árið 2025

Nú eru síðustu sveitarfélög að afgreiða endurskoðaða húsnæðisáætlun fyrir árið 2025 og er hver og ein húsnæðisáætlun aðgengileg á vef HMS að lokinni staðfestingu viðkomandi sveitarstjórnar. Stefnt er að því að kynntar verði helstu niðurstöður húsnæðisáætlana fyrir 2025 og framtíðarhorfur íbúðauppbyggingar á opnum fundi hjá HMS í september næstkomandi.

Eftirfylgni húsnæðisáætlana sveitarfélaga fyrir árið 2024

HMS framkvæmdi sína aðra mánaðarlegu spurningakönnun á meðal fasteignasala þann 16. júní, en í könnuninni er spurt um viðhorf fasteignasalanna til fasteignamarkaðarins. Könnunin var send á félagsmenn Félags fasteignasala, en þeir eru um 330 talsins. Alls bárust 112 svör og var svarhlutfall því 34%. 

Niðurstöður könnunarinnar bendir til þess að markaðurinn sé á valdi kaupenda en í síðasta mánuði var meirihluti fasteignasala á því að markaðurinn væri hvorki á valdi kaupenda né seljenda.  

Þetta kemur sér í lagi fram í svörum fasteignasala sem miðla fasteignum á höfuðborgarsvæðinu, en á landsbyggðinni eru ívið fleiri sem telja markaðinn vera hvorki á valdi kaupanda né seljenda. Á meðfylgjandi mynd má sjá hlutfall þeirra fasteignasala sem svöruðu því til að markaðurinn væri á valdi kaupanda, í jafnvægi eða á valdi seljenda eftir því hvort fasteignasali miðlaði fasteignum á höfuðborgarsvæðinu eða á landsbyggðinni. 

Meirihluti fasteignasala á höfuðborgarsvæðinu telja verðþróun á fasteignamarkaði þessa stundina vera stöðuga og um fimmti hver fasteignasali telur verðþróun vera til lítilsháttar hækkunar. Álíka svör um verðþróun má lesa úr svörum þeirra fasteignasala sem miðla fasteignum í nágrenni höfuðborgarsvæðisins. Hins vegar upplifa fasteignasalar sem miðla fasteignum á Akureyri að verð fari hækkandi þar en lítillega þó.

Á meðfylgjandi mynd má skjá meðaltal úr svörum könnunarinnar í júní, en samkvæmt því er fasteignamarkaðurinn á valdi kaupenda þessa stundina.

Fasteignasalar telja markaðinn á valdi kaupenda á höfuðborgarsvæðinu í júní

Fyrsta skóflustunga hefur verið tekin að nýju verkefni Bjargs íbúðafélags hses. sem hyggst reisa 30 íbúðir við Trölladal 1–11 í Reykjanesbæ. Verkefnið nýtur stuðnings í formi stofnframlaga frá ríki og sveitarfélagi sem var samþykkt í annarri úthlutun ársins 2023.

Um er að ræða sex fjölbýlishús þar sem hvert fjölbýli inniheldur fimm almennar leiguíbúðir fyrir tekju- og eignaminni einstaklinga og fjölskyldur. Íbúðirnar verða af mismunandi stærð, allt frá tveggja herbergja upp í fimm herbergja íbúðir. Áætlað er að fyrstu íbúðir fari í útleigu í júlí 2026.

Halldóra Fríða Þorvaldsdóttir, bæjarstjóri Reykjanesbæjar, segir uppbygginguna mikilvæg skref í átt að húsnæðisöryggi í bænum: „Við erum afskaplega ánægð að þessar framkvæmdir eru að fara af stað, sérstaklega í ljósi þess að uppbygging Bjargs íbúðafélags tryggir öruggt og hagkvæmt leiguhúsnæði. Við fögnum einnig áherslum Bjargs um skýr markmið um kostnað og gæði íbúða og erum fullviss um að uppbyggingin verði jákvæð fyrir samfélagið okkar.“

Með þessum nýju íbúðum eykst framboð leiguíbúða í Reykjanesbæ sem reknar eru án hagnaðarsjónarmiða og stuðlar að auknu húsnæðisöryggi og stöðugleika fyrir tekju- og eignaminni heimili, en það er einmitt markmið laga um almennar íbúðir.

Nýtt verkefni Bjargs íbúðafélags í Trölladal í Reykjanesbæ

Mánaðarskýrsla HMS fyrir júní 2025 er komin út, en hana má nálgast með því að smella á hnappinn hér fyrir neðan. Í skýrslunni kemur meðal annars fram að fasteignamarkaður hefur verið við stofuhita í ár, samkvæmt mismunandi mælikvörðum HMS. Leigumarkaðurinn hefur sýnt merki aukins eftirspurnarþrýstings á síðustu mánuðum eftir að hafa kólnað nokkuð í fyrravetur.

Gogn_manadarskyrsla_juni25.xlsx

Fjöldi kaupsamninga og verðþrýstingur í samræmi við meðaltal síðustu tíu ára

Fasteignamarkaðurinn hefur verið við stofuhita í ár, samkvæmt mismunandi mælikvörðum HMS. Fjöldi kaupsamninga og verðþrýstingur hefur verið í samræmi við meðaltal síðastliðinna tíu ára, en nýjar íbúðir seljast þó verr en aðrar íbúðir. 

Fasteignasalar telja að umsvif á fasteignamarkaðnum séu frekar lítil í júní, samkvæmt mánaðarlegri könnun HMS hjá félagsmönnum Félags fasteignasala. Meirihluti svarenda könnunarinnar sem miðla fasteignum á höfuðborgarsvæðinu telja fasteignamarkaðinn vera á valdi kaupenda þessa stundina.  

Aukin eftirspurnarþrýstingur á leigumarkaði

Leigumarkaðurinn hefur sýnt merki aukins eftirspurnarþrýstings á síðustu mánuðum eftir að hafa kólnað nokkuð í fyrravetur. Á leiguvefnum Myigloo.is eru álíka margir virkir leitendur og um mitt ár i fyrra og eru þeir um tvöfalt fleiri en fjöldi leigusamninga sem skráðir eru af vefnum. 

Umsvif á skammtímaleigumarkaði eru álíka mikil og í fyrra. Þó var talsverð fjölgun í apríl samanborið við fyrri ár sem bendir til að umsvif á skammtímaleigumarkaði geti orðið meiri í sumar samanborið við síðustu tvö sumur. 

Hrein ný lántaka töluverð hjá lífeyrissjóðum

Á lánamarkaði var hrein ný lántaka mjög lítil hjá bönkunum í apríl, þriðja mánuðinn í röð, þar sem álíka mikið var greitt upp af óverðtryggðum lánum og tekið var að láni í nýjum hreinum verðtryggðum lánum. Aftur á móti var hrein ný lántaka töluverð hjá lífeyrissjóðunum. Veðsetningarhlutföll hjá lífeyrissjóðum eru almennt lægri en hjá bönkum en á móti kemur búa heimilin að talsverðum sparnaði þar sem innlán heimila hafa aukist umfram ráðstöfunartekjur á síðustu misserum. 

Fjárfesting jókst í íbúðarhúsnæði í fyrra

Á byggingarmarkaði jókst fjárfesting í íbúðarhúsnæði um tæpan fimmtung að raunvirði í fyrra eftir að hafa dregist saman árið 2023. Að jafnaði störfuðu 5,4% fleiri í byggingariðnaði í fyrra var en árið 2023 en dregið hefur úr fjölgun starfsfólks í greininni í ár sem þó er bundin talsverðum árstíðasveiflum. 

Vísitala leiguverðs hækkaði á milli mánaða í maí og mældist 123,3 stig

Vísitalan hækkaði um 8,83 prósent á milli maímánaða 2024 og 2025, á meðan verðbólga mældist 3,8 prósent á sama tímabili

Markaðsleiga hækkaði um 4,9 prósent að raunvirði á ársgrundvelli í maí, samanborið við 6,6 prósenta raunverðshækkun í apríl

Vísitala leiguverðs á höfuðborgarsvæðinu mældist 123,3 stig og hækkaði um 1,15 prósent á milli mánaða í maí. Á síðustu tólf mánuðum hefur vísitala leiguverðs hækkað um 8,83 prósent, á sama tíma og verðbólga mældist 3,8 prósent og vísitala íbúðaverðs hækkaði um 5,72 prósent. Leiguverð hækkaði því um 4,9 prósent að raunvirði á milli maímánaða 2024 og 2025.

Á meðfylgjandi mynd má sjá mánaðarlega breytingu á vísitölu leiguverðs ásamt gildum hennar síðustu 12 mánuði.

Vísitala leiguverðs byggir á vegnu meðaltali leiguverðs á fermetra hjá hefðbundnum íbúðum í eigu einstaklinga og hagnaðardrifinna leigufélaga. Niðurstöður eru vegnar saman með veltu íbúða með sama herbergjafjölda á síðustu 12 mánuðum. Stuðst er við nýskráða leigusamninga síðastliðinna tveggja mánaða við útreikning vísitölunnar, svo maígildi hennar tekur mið af leigusamningum í apríl og maí.

Leiguverðsjá sýnir einnig hækkun á milli mánaða í maí

Hægt er að nálgast upplýsingar um leigusamninga í leiguverðsjá HMS, þar sem leigusalar og leigjendur geta nálgast upplýsingar um markaðsverð íbúða og fjölda leigusamninga í hverjum mánuði.

Fermetraverð markaðsleigu á höfuðborgarsvæðiun miðað við 60-90 fermetra leiguhúsnæði í herbergjaflokkum tveggja til fjögurra herbergja var að meðaltali 3.901 kr. í mars og apríl og 3.918 kr. í apríl og maí. Fermetraverð markaðsleigu á ofangreindum íbúðum á höfuðborgarsvæðinu hækkaði þar með um 0,44 prósent milli mánaða. Hafa ber þó í huga að leiguverðsjáin sýnir ekki leiguverð einstakra samninga, einungis meðaltöl.

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu leiguverðs á höfuðborgarsvæðinu, auk þess er hægt að nálgast eldri og sameinaðar vísitölur leiguverðs.

Vísitala leiguverðs hækkaði um 1,15 prósent í maí 2025

Vísitala íbúðaverðs mældist 110,9 stig í maí og lækkaði um 0,45 prósent á milli mánaða, eftir að hafa hækkað um 0,45 prósent í apríl

Á síðustu tólf mánuðum hefur íbúðaverð hækkað um 5,72 prósent, á sama tíma og verðbólga mældist 3,8 prósent

Undirvísitölur íbúðaverðs lækkuðu á höfuðborgarsvæðinu en hækkuðu utan höfuðborgarsvæðisins

Íbúðaverð lækkaði um 0,45 prósent á milli mánaða í maímánuði, samkvæmt nýjustu gildum úr vísitölu íbúðaverðs. Þetta er í fyrsta skiptið sem íbúðaverð lækkar á milli mánaða á þessu ári, en það gerðist síðast í desember árið 2024. 

Vísitala íbúðaverðs mældist 110,9 stig í maí, og lækkaði hún úr 111,4 stigum í apríl. Vísitalan hækkaði um 5,72 prósent á milli maímánaða 2024 og 2025, en til samanburðar mældist verðbólgan 3,8 prósent á sama tíma. Íbúðaverð hækkaði því að raunvirði um 1,9 prósent á milli maímánaða 2024 og 2025.

Á mynd hér að neðan má sjá mánaðarbreytingu vísitölu íbúðaverðs á síðustu mánuðum.

Taflan hér að neðan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Vísitala | Gildi | Breyting á milli mánaða | 12 mánaða breyting

Lækkanir á höfuðborgarsvæði en hækkanir á landsbyggðinni

Lækkun íbúðaverðs í maímánuði er drifin áfram af lækkun á verði íbúða á höfuðborgarsvæðinu en íbúðaverð hækkaði milli mánaða á landsbyggðinni. Undirvísitölur fjölbýlis og sérbýlis á landsbyggðinni hækkuðu um yfir 1 prósent á milli mánaða, á meðan fjölbýli á höfuðborgarsvæðinu lækkaði um 0,27 prósent á milli mánaða og sérbýli á höfuðborgarsvæðinu lækkaði um 2,14 prósent á milli mánaða.

Milli maímánaða 2024 og 2025 hækkaði íbúðaverð á landsbyggðinni um 9,06 prósent en samsvarandi hækkun nam 4,59 prósentum á höfuðborgarsvæðinu.  Líkt og sést í töflunni hér að ofan hefur íbúðaverð fjölbýlis á landsbyggðinni hækkað mest frá maímánuði 2024, eða um 11,45 prósent. Fjölbýlisíbúðir á höfuðborgarsvæðinu hafa hins vegar hækkað um 4,11 prósent á sama tíma.

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð.

Einnig sýnir mælaborðið undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri undirvísitölu íbúðaverðs á höfuðborgarsvæðinu og tekur gildið 100 í janúar 2024.

Vísitala íbúðaverðs lækkaði um 0,45 prósent í maí 2025

Fréttir af húsnæðismarkaðnum

Fasteignamat

Brunabótamat

Eignin mín

Skráning fasteigna

Áætlun eignamarka

Fasteignaskrá - áskrift

Mælaborð fasteignaskrár

Um fasteignaskrá

Fáðu yfirsýn yfir fasteignamat, brunabótamat, stærðir og byggingarefni í fasteignaskrá.