14. ágúst 2025
14. ágúst 2025
Nýjar íbúðir seljast sjaldan á undirverði þrátt fyrir litla sölu
- Verðálag á nýjar íbúðir í júní er í samræmi við meðaltal síðustu ára á höfuðborgarsvæðinu
- 38 prósent nýrra íbúða seldist undir ásettu verði í júní en hlutfallið hefur oft verið hærra
- Verðlækkanir á auglýstum íbúðum í nýbyggingum á höfuðborgarsvæðinu eru álíka margar og árið 2023
Ekki má greina miklar breytingar í verðlagningu nýrra íbúða eftir að hægja tók á fasteignamarkaðinum fyrir ári síðan. Verðálag á nýjar íbúðir hefur verið í samræmi við meðaltal síðustu ára, auk þess sem álíka margar nýjar íbúðir hafa selst á undirverði, þrátt fyrir að sala á nýjum íbúðum hafi dregist saman. Þetta kemur fram í greiningu úr kaupskrá HMS.
Nýjar íbúðir 12 til 25 prósent dýrari en aðrar íbúðir
Meðalfermetraverð í nýjum íbúðum á höfuðborgarsvæðinu í júní var 12 prósent hærra en meðalfermetraverð í öðrum seldum íbúðum í mánuðinum. Verðálagið á höfuðborgarsvæðinu er þannig í samræmi við meðalverðmun á svæðinu undanfarin ár.
Í nágrenni höfuðborgarsvæðisins var verðálagið aftur á móti um 25 prósent í júní samanborið við 14 prósent meðalverðmun undanfarin ár. Á meðfylgjandi mynd má sjá hlutfallið á milli fermetraverðs á nýjum og öðrum íbúðum eftir svæðum frá janúar 2019.
Fjórar af hverjum tíu nýjum íbúðum seldar á undirverði
Almennt víkur söluverð nýrra íbúða í minna mæli frá auglýstu verði en söluverð annarra íbúða. Þannig seljast flestar nýjar íbúðir á ásettu verði á meðan algengast er að aðrar íbúðir seljist á undirverði.
Í júní seldust tæplega fjórar af hverjum tíu nýjum íbúðum undir auglýstu söluverði. Hlutfallið hefur þó oft verið hærra þrátt fyrir að framboð nýrra íbúða hafi aldrei verið meira og hlutfall nýrra íbúða af seldum íbúðum sé lágt í sögulegu samhengi. Við slíkar aðstæður mætti búast við að kaupendur myndu undirbjóða nýjar íbúðir í auknu mæli og að byggingaraðilar sæju hag sinn í því að samþykkja slík tilboð til að liðka fyrir sölu og losna undan áhvílandi skuldum.
Verðlækkanir á nýjum íbúðum til sölu álíka margar og 2023
Framangreint nær þó eingöngu til seldra íbúða. Í ljósi þess að margar nýjar íbúðir eru óseldar um þessar mundir getur verið áhugavert að skoða verðbreytingar á auglýstum íbúðum. Gögn um fasteignaauglýsingar af vefnum fasteignir.is sýna að nýjum íbúðum á söluskrá sem lækkaðar eru í verði eru nú álíka margar og á árinu 2023 þegar rólegt var um að litast á fasteignamarkaði og fasteignaverð lækkaði að raunvirði. Nánar er fjallað um þetta í mánaðarskýrslu hagdeildar HMS sem gefin verður út í næstu viku.
