Brunavarnir
Brunavarnir
Brunamálaskólinn
Brunamálaskólinn
Brunamálaskólinn veitir slökkviliðsmönnum, stjórnendum og eldvarnaeftirlitsmönnum um allt land nauðsynlega menntun, starfsþjálfun og endurmenntun. Bóklegt nám skólans byggist að mestu leiti upp á fjarkennslu og er námið nánast allt sett upp þannig að nemendur taka fyrst bóklegan hluta hverrar lotu sem síðan er fylgt eftir með verklegum hluta.
Nám við Brunamálaskólann er fyrir starfandi slökkviliðsmenn og því einungis í boði fyrir þá.
Við inngöngu í slökkvilið er fyrsta skrefið að fara í gegnum kynningu. Bæði er þar um að ræða kynningu á starfsstöð, búnaði og verkefnum viðkomandi slökkviliðs en einnig þarf að fara í gegnum bóklegan kynningarhluta Brunamálaskólans. Síðan er ætlast til að nemendur gangi í gegnum alls 24 klst af verklegum æfingum í slökkvi- og björgunartækni hjá sínu slökkviliði, þ.m.t. 3 klst í reykköfun með þar til gerðan búnað, áður en frekara nám er hafið.
Námleiðir Brunamálaskólans
Allir slökkviliðsmenn fara í gegnum grunnnám skólans sem skipt er upp í fjórar lotur og er hver lota byggð upp á bóklegum fjarnámshluta auk verklegrar þjálfunar. Grunnnámið veitir slökkviliðsmönnum rétt til að sækja um löggildingu sem slökkviliðsmaður.
Skólinn býður einnig uppá framhaldsnám að loknu grunnnámi fyrir slökkviliðsmenn sem hafa slökkvistarf að aðalatvinnu ásamt endurmenntun fyrir alla slökkviliðsmenn.
Auk þess að bjóða upp á menntun fyrir hin almenna slökkviliðsmann býður skólinn einnig uppá stjórnendanám fyrir stjórnendur og varðstjóra og nám fyrir eldvarnareftirlitsmenn.
