Rafbíll er með margskonar stýringu á rafhlöðu bílsins til að tryggja endingu hennar og virkni. Það fer betur með endingu Li-ion rafhlaða, sem eru í flestum rafbílum, að hlaða þær ekki að fullu (100%) á hverjum degi. Almennt ætti ekki að vera þörf á að hleðslubúnaður einstaklinga miðist við að hægt sé að hlaða bílinn að fullu yfir nótt. Notendur gætu þó viljað hafa þann möguleika til staðar vegna aukinnar notkunar. Það hægist á hleðslu rafhlaða þegar þær eru komnar upp í 80-90% af fullri hleðslu.

Rafhlöður geyma rafmagn með jafnstraumi (DC). Venjulegt húsarafmagn er hins vegar með riðstraumi (AC) og því þarf straumbreyti sem er í bílnum til að breyta yfir í jafnstraum rafhlöðunnar. 

Hraðhleðslustöðvar hlaða með jafnstraumi (DC) beint inn á rafhlöðu bílsins.