Mánaðarskýrsla HMS fyrir mars 2025 er komin út, en hana má nálgast með því að smella á hnappinn hér fyrir neðan. Í skýrslunni kemur meðal annars fram að fasteignamarkaðurinn var virkur miðað við árstíma í janúar. Á leigumarkaði gætu allt að 37 þúsund einstaklingar verið vantaldir á leigumarkaði, þar sem opinberar kannanir um búsetu fólks hafa ekki náð vel til erlendra leigjenda.

Meira líf á fast­eigna­mark­aði í jan­ú­ar mið­að við síð­ustu ár

Fasteignamarkaðurinn var virkur miðað við árstíma í janúar, þar sem rúmlega 700 kaupsamningum var þinglýst á landinu öllu. Janúarmánuður er að jafnaði rólegri á fasteignamarkaði heldur en aðrir mánuðir, en virkni á fasteignamarkaði var töluvert meiri en á sama tíma árs 2023 og 2024.

Íbúðum sem teknar hafa verið af söluskrá hefur fjölgað hratt í febrúar, sem bendir til þess að umsvif á fasteignamarkaði hafi aukist enn frekar á síðustu vikum. Um helmingi fleiri íbúðir voru teknar af söluskrá í janúar og febrúar á þessu ári samanborið við sömu mánuði árin 2022 og 2023.

Al­menn skrán­ing­ar­skylda mun draga úr vantaln­ingu leigj­enda

Á leigumarkaði hafa víðtækar undanþágur frá skráningarskyldu leigusamninga leitt til ófullnægjandi upplýsingagjafar um markaðinn. Allt að 37 þúsund fullorðnir einstaklingar gætu verið vantaldir á leigumarkaði, þar sem opinberar kannanir um búsetu fólks hafa ekki náð vel til erlendra leigjenda.

HMS hefur hafið átak í tölfræðisöfnun til þess að afla betri upplýsinga um húsnæðisaðstæður erlendra íbúa á Íslandi í samræmi við nýtt hlutverk sitt um að halda leiguskrá. Erlendir íbúar eru mun líklegri til að vera á leigumarkaði en ekki, en einungis 14 prósent þeirra eru skráðir fasteignaeigendur.

Vís­bend­ing­ar um aukna ásókn í óverð­tryggð lán sam­hliða lægri vöxt­um á slík­um lán­um

Á lánamarkaði eru vísbendingar um aukna ásókn í óverðtryggð lán samhliða lægri vöxtum á slíkum lánum. Uppgreiðslur heimila á slíkum lánum að frádreginni nýrri lántöku námu 6,1 milljarði króna og hafa þær ekki verið minni frá miðju ári 2023.

Fólks­fjölg­un í fyrra var í sam­ræmi við hús­næð­is­á­ætl­an­ir

Á byggingarmarkaði hafa margar nýjar íbúðir komið á fasteignamarkað á fyrstu tveimur mánuðum ársins. Í janúar og febrúar komu samtals 585 íbúðir á markað en á sama tíma í fyrra komu 425 nýbyggðar íbúðir á húsnæðismarkaðinn.

Áætluð íbúafjölgun í húsnæðisáætlunum sveitarfélaga á síðasta ári reyndist vera nálægt rauntölum, en fjölgunin var ofmetin um 2,6 prósent. Sveitarfélögin miðuðu við áætlaða íbúafjölgun til að meta íbúðaþörf sína, sem nam tæplega 4.200 íbúðum í fyrra, en aðeins 3.665 íbúðir voru fullbyggðar og settar á fasteignamarkað það ár.