Vísitala leiguverðs á höfuðborgarsvæðinu mældist 124,9 stig í ágúst og hækkaði um 0,32 prósent á milli mánaða. Vísitalan hefur hækkað um 6,66 prósent á undanförnum 12 mánuðum, á sama tíma og verðbólga mældist 3,8 prósent og íbúðaverð hækkaði um 2,21 prósent.

Árstaktur vísitölunnar hækkar á milli mánaða, hvort sem litið er til nafnverðsþróunar eða raunverðsþróunar, eftir að hafa farið lækkandi frá áramótum.

Hægt er að nálgast mælaborð fyrir vísitölur HMS með því að smella á hnappinn hér að neðan

Á meðfylgjandi mynd má sjá mánaðarlega breytingu á vísitölu leiguverðs ásamt gildum hennar síðustu 12 mánuði.

Vísitala leiguverðs byggir á vegnu meðaltali leiguverðs á fermetra hjá hefðbundnum íbúðum í eigu einstaklinga og hagnaðardrifinna leigufélaga. Niðurstöður eru vegnar saman með veltu íbúða með sama herbergjafjölda á síðustu 12 mánuðum. Stuðst er við leigusamninga síðastliðinna tveggja mánaða við útreikning vísitölunnar, svo ágústgildi hennar tekur mið af leigusamningum í júlí og ágúst.

Árstakt­ur vísi­töl­unn­ar hækk­ar eft­ir að hafa far­ið lækk­andi frá ára­mót­um

Vísitala leiguverðs á höfuðborgarsvæðinu hækkaði meira að nafnvirði og raunvirði á ársgrundvelli í ágúst samanborið við í júlí og júní. Hægt hafði á nafnverðs- og raunverðshækkun vísitölunnar frá áramótum fram til þessa, líkt og sjá má á meðfylgjandi mynd.

Leiguverð hækkaði um 2,80 prósent að raunvirði á ársgrundvelli í ágúst, samanborið við 1,10 prósent í júlí og 1,55 prósent í júní. Að nafnvirði hækkaði vísitalan um 6,66 prósent í ágúst, samanborið við 5,15 prósent í júlí og 5,77 prósent í júní.

Vísitala leiguverðs hækkaði mikið á milli mánaða í apríl, maí, júní og júlí í fyrra, eða á bilinu 1,57 – 3,19 prósent. Hækkun árstaktsins nú í ágúst skýrist að miklu leyti af því að há vísitölugildi í júlí í fyrra detta út úr mælingunni, en vísitala íbúðaverðs lækkaði um 1,1 prósent á milli mánaða í ágúst í fyrra.