HMS hefur afgreitt allar beiðnir um endurmat á brunabótamati íbúða í eigu einstaklinga sem stofnuninni hafa borist frá Grindavík. Fjöldi endurmatsbeiðna sem leiddu til hækkunar komu á óvart sem gefur vísbendingu um að fólk er ekki að sækja um endurmat í kjölfar endurbóta eða nýframkvæmda og líkur á því að brunabótamat sé því víða vanmetið.

Marg­falt fleiri end­ur­mats­beiðn­ir en venju­lega

Líkt og HMS hefur áður bent á hefur stofnuninni borist margfalt fleiri endurmatsbeiðnir en alla jafna vegna brunabótamats í kjölfar jarðhræringa og eldsumbrota í Grindavík á síðustu mánuðum. Í fyrrahaust tók HMS frumkvæði að því að tryggja að allar eignir sem áttu að vera með brunabótamat í Grindavík og víðar á Suðurnesjum væru með brunabótamat, auk þess sem stofnunin endurskoðaði eignir sem voru með fryst brunabótamat.

HMS sendi einnig áskoranir á eigendur að hafa samband með upplýsingum um eignir sínar ef grunur lék á að brunabótamatið væri vanmetið, til dæmis vegna meiri háttar framkvæmda sem ekki hefur verið tekið tillit til. Þess fyrir utan hvatti stofnunin íbúðaeigendur til að huga að brunabótamatinu á húseignum sínum í fjölmiðlum, auk þess sem vakin var athygli á möguleikanum á endurmati á íbúafundum með Grindvíkingum. Í kjölfarið fór að bera á mikilli aukningu í fjölda beiðna til HMS strax alls staðar af landinu í október og var fjöldi beiðna um endurmat þrefalt fleiri í október og fimmfalt fleiri í nóvember en alla jafna á mánuði.

Í febrúar voru svo ný lög samþykkt um stofnun fasteignafélagsins Þórkötlu og uppkaup ríkisins á íbúðarhúsnæði í eigu einstaklinga í Grindavík. Lögin leiddu til enn fleiri endurmatsbeiðna þar sem kaupverðið á íbúðunum fer eftir brunabótamati þeirra. Í kjölfarið fékk HMS álíka mörg verkefni og stofnuninni berst alla jafna á tveimur árum.

Bruna­bóta­mat er lík­lega oft van­met­ið

HMS hefur áður bent á að líklega er brunabótamat vanmetið um allt land, þar sem íbúðaeigendur þurfa sjálfir að sækja um endurmat brunabótamats eftir að hafa staðið í meiri háttar framkvæmdum á eignum sínum. Til meiri háttar framkvæmda flokkast til dæmis viðbætur við íbúð á borð við sólpall, skjólveggi úr timbri og heitan pott.

Brunabótamat er á ábyrgð fasteignaeigenda og á að endurspegla kostnaðinn við að byggja húsið aftur ef til altjóns kæmi. Niðurstöður úr endurmatsbeiðnum íbúðaeigenda í Grindavík rennir stoðum undir þá kenningu að brunabótamat íbúðaeigna sé almennt vanmetið og fjölmargir fasteignaeigendur því vantryggðir, þar sem hátt hlutfall íbúðanna þurfti endurmat.