Í ljósi aukinnar rafbílanotkunar og upphafs ferðasumarsins vill HMS benda ökumönnum rafbíla á eftirfarandi atriði þegar ferðast er um landið:

Á mörgum stöðum um landið er ekki auðvelt fyrir eigendur að komast að hleðslustöð þegar best hentar. Þá getur verið freistandi að nota neyðarhleðslutækið og stinga í samband í næsta tengil, til dæmis á tjaldsvæði, gististað eða í sumarbústað. Með slíkum tengingum getur hins vegar skapast töluverð slysa- og brunahætta.

Hver einstakur tengipunktur til hleðslu rafbíla skal varinn með yfirstraumsvarnarbúnaði og bilunarstraumsrofa (lekastraumsrofa) af réttri gerð, sem eingöngu verja þennan tiltekna tengipunkt. Í flestum tilfellum henta hefðbundnir heimilistenglar ekki til hleðslu rafbíla, nema þeir séu varðir og tryggt sé að straumur fari ekki yfir 8 til 10A.

HMS bendir á leiðbeiningar sem stofnunin hefur gert varðandi hleðslu rafbíla og hleðsluaðferðir, sem nálgast má með því að smella á þennan hlekk. Sömuleiðis má finna frekari upplýsingar um rafmagnsöryggi og rafbíla, sem nálgast má með því að smella á þennan hlekk.

Mikilvægt er að rekstraraðilar sem bjóða gistingu upplýsi viðskiptavini sína um hvort viðeigandi búnaður til hleðslu rafbíla sé til staðar og hvernig standa skuli að hleðslu.