Vísitala leiguverðs á höfuðborgarsvæðinu mældist 118,6 stig og lækkaði um 0,25 prósent á milli mánaða í janúar. Vísitalan hefur því lækkað síðustu tvo mánuði en hún lækkaði um 0,9 prósent á milli mánaða í desember.

Á ársgrundvelli hefur vísitala leiguverðs hækkað um 12 prósent, á sama tíma og verðbólga mældist 4,6 prósent og vísitala íbúðaverðs hækkaði um 10,4 prósent. Á meðfylgjandi mynd má sjá mánaðarlega breytingu  á vísitölu leiguverðs ásamt gildi hennar síðustu 12 mánuði.

Vísitala leiguverðs byggir á vegnu meðaltali leiguverðs á fermetra hjá hefðbundnum íbúðum í eigu einstaklinga og hagnaðardrifinna leigufélaga. Niðurstöður eru vegnar saman með veltu íbúða með sama herbergjafjölda á síðustu 12 mánuðum. Stuðst er við leigusamninga síðastliðinna tveggja mánaða við útreikning vísitölunnar, svo janúargildi hennar tekur mið af leigusamningum í desember og janúar.

Hægt er að nálgast upplýsingar um leigusamninga í leiguverðsjá HMS, en hana má nálgast með því að smella á þennan hlekk.

Hægt hef­ur á hækk­un leigu­verðs síð­ustu mán­uði

Eftir miklar leiguverðshækkanir fyrri part síðasta árs hefur hægt mjög á hækkun leiguverðsvísitölunnar síðustu mánuði og nemur sex mánaða hækkun hennar einungis 0,2 prósent. Sé horft yfir lengra tímabil hefur vísitala leiguverðs hækkað um 12 prósent á síðustu 12 mánuðum á meðan vísitala neysluverðs hækkaði um 4,6 prósent á sama tímabili.

Á ársgrundvelli heldur leiguverð áfram að hækka umfram verðlag í landinu öllu, en 12 mánaða raunverðshækkun vísitölu leiguverðs nam 7 prósent í janúar. Til samanburðar hækkaði leiguverð um 7,5 prósent að raunvirði á ársgrundvelli í desember og 6,4 prósent í nóvember.

Mæla­­­­borð fyr­­­­ir vísi­­­­töl­­­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu leiguverðs á höfuðborgarsvæðinu, auk þess er hægt að nálgast eldri og sameinaðar vísitölur leiguverðs. Mælaborðið má finna á https://hms.is/gogn-og-maelabord/visitolur