Vísitala leiguverðs á höfuðborgarsvæðinu mældist 118,5 stig í október og hækkaði um 1,8 prósent á milli mánaða eftir að hafa lækkað tvo mánuði í röð í ágúst og september. Gildi vísitölunnar í október er nú svipað og það var í júlí síðastliðnum.

Á ársgrundvelli hefur vísitala leiguverðs hækkað um 11,16 prósent, á sama tíma og verðbólga mældist 5,1 prósent og vísitala íbúðaverðs hækkaði um 8,7 prósent, líkt og taflan hér að neðan sýnir.

Vísitala leiguverðs byggir á vegnu meðaltali leiguverðs á fermetra hjá hefðbundnum íbúðum í eigu einstaklinga og hagnaðardrifinna leigufélaga. Niðurstöður eru vegnar saman með veltu íbúða með sama herbergjafjölda á síðustu 12 mánuðum. Stuðst er við leigusamninga síðastliðinna tveggja mánaða við útreikning vísitölunnar, svo októbergildi hennar tekur mið af leigusamningum í september og október.

Leig­u­verð­­sjá sýn­­ir sam­bæri­lega hækk­un og vísi­tal­an

Ný leiguverðsjá kom út á vef HMS í september, en með henni geta leigusalar og leigutakar nálgast upplýsingar um markaðsverð íbúða og fjölda leigusamninga í hverjum mánuði.

Samkvæmt leiguverðsjánni hækkaði markaðsleiga tveggja og þriggja herbergja íbúða á höfuðborgarsvæðinu um 2,2 prósent á milli september og október, en  fermetraverð á leigu slíkra íbúða nam 4.054 krónum í október. Hafa ber þó í huga að leiguverðsjáin sýnir ekki leiguverð einstakra samninga, einungis meðaltöl.

Nýtt mæla­borð fyr­ir vísi­töl­ur HMS

Nýtt mælaborð fyrir vísitölur HMS um íbúða- og leiguverð er nú aðgengilegt á vef HMS. Þar er hægt að nálgast þróun vísitölu leiguverðs á höfuðborgarsvæðinu, auk þess er hægt að nálgast eldri og sameinaðar vísitölur leiguverðs. Mælaborðið má finna á https://hms.is/gogn-og-maelabord/visitolur