Vísitala leiguverðs á höfuðborgarsvæðinu var 118,4 stig í júlí 2024 og hækkaði um 2,0 prósent á milli mánaða. Á ársgrundvelli hefur vísitala leiguverðs hækkað um 15,1 prósent, á sama tíma og verðbólga mældist 6,3 prósent og vísitala íbúðaverðs hækkaði um 11 prósent.

Vísitalan byggir á nýjum leigusamningum í Leiguskrá HMS um hefðbundnar íbúðir sem eru í eigu einstaklinga og fyrirtækja sem eru rekin í hagnaðarskyni. Stuðst er við leigusamninga síðastliðna tvo mánuði, þannig að nýjasta gildi hennar byggir á samningum í júní og júlí. Vísitalan byggir því ekki á leigusamningum hjá óhagnaðardrifnum leigufélögum eða sveitarfélögum.

Þróun leiguvísitölunnar frá maímánuði 2023 má sjá á mynd hér að neðan. Einnig er hægt að nálgast eldri og sameinaðar vísitölur HMS á hms.is/visitolur.

Vísitalan hækkaði um 8,2 prósent á ársgrundvelli í júlí umfram verðbólgu, en raunverðshækkanirnar voru nær 7 prósentum í apríl, maí og júní. Á þeim 12 árum sem sameinuð leiguverðsvísitala nær yfir hefur raunverðshækkun á ársgrundvelli aðeins verið meiri á árinu 2017, en þá var hún á bilinu 10 til 12 prósent.

Hægt er að nálgast gögn úr Leiguskrá HMS um fjölda leigusamninga sem taka gildi og falla úr gildi eftir landshlutum og tegund leigusala á hms.is/gogn-og-mælaborð/leiguskra.