Vísitala íbúðaverðs mældist 111,4 stig í mars og hækkaði um 0,45 prósent á milli mánaða. Á síðustu tólf mánuðum hefur íbúðaverð hækkað um 7,63 prósent, á sama tíma og verðbólga mældist 4,2 prósent.

Mánaðarhækkun íbúðaverðs hefur verið undir 0,5 prósentum á síðustu þremur mánuðum, en á síðustu 12 mánuðum hefur mánaðarbreyting íbúðaverðs verið að meðaltali um 0,6 prósent. Á mynd hér að neðan má sjá mánaðarbreytingu vísitölu íbúðaverðs á síðustu mánuðum.

Taflan hér að neðan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Verð á fjöl­býl­um á höf­uð­borg­ar­svæð­inu helst óbreytt milli mán­aða

Verð á fjölbýlum á höfuðborgarsvæðinu helst óbreytt milli mánaða þar sem undirvísitala slíkra eigna mældist það sama í apríl og í mars. Verð á fjölbýliseignum á höfuðborgarsvæðinu hefur haldist stöðugt síðustu þrjá mánuði, en þriggja mánaða verðbreyting á fjölbýlum á höfuðborgarsvæðinu mældist -0,2 prósent.

Mánaðarhækkun íbúðaverðs var mest hjá fjölbýlum á landsbyggðinni og næst mest hjá sérbýlum á höfuðborgarsvæðinu, en mánaðarhækkun fjölbýla á landsbyggðinni nam yfir tveimur prósentustigum.

Íbúðaverð heldur áfram að hækka umfram verðlag á landinu öllu en hækkaði minna í apríl samanborið við mars. Raunverðshækkun nam 3,3 prósent í apríl. Til samanburðar hækkaði raunverð íbúða um 4,06 prósent á milli marsmánaða 2024 og 2025.

Mæla­­­­­borð fyr­­­­­­ir vísi­­­­­­töl­­­­­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð.

Einnig sýnir mælaborðið undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri undirvísitölu íbúðaverðs á höfuðborgarsvæðinu og tekur gildið 100 í janúar 2024.