Vísitala íbúðaverðs mældist 113,8 stig í apríl og stóð því í stað á milli mánaða. Undanfarna tólf mánuði hefur vísitalan hækkað um 2,15% á sama tíma og verðbólga mældist 5,2%. Íbúðaverð hefur því lækkað um 2,94% að raunvirði undanfarið ár.

Á myndinni hér að neðan má sjá vísitölu íbúðaverðs og mánaðarbreytingu hennar síðustu mánuði. 

Líkt og sjá má á töflunni hér að neðan hækkuðu undirvísitölur fyrir sérbýli bæði á höfuðborgarsvæðinu og á landsbyggðinni milli mánaða á meðan undirvísitölur fyrir fjölbýli stóðu í stað eða lækkuðu. Á undanförnum 12 mánuðum hefur verð á fjölbýli á höfuðborgarsvæðinu hækkað um 1,92% og á landsbyggðinni um 0,6%. Að raunvirði hefur verð á fjölbýli á höfuðborgarsvæðinu því lækkað um 3,16% síðastliðið ár og á landsbyggðinni hefur það lækkað um 4,42%. Verð á sérbýli hefur hins vegar lækkað minna að raunvirði síðustu 12 mánuði, eða um 2,22% á landsbyggðinni og 2,79% á höfuðborgarsvæðinu.

Spá áfram­hald­andi raun­verðs­lækk­un­um á næsta ári

Íbúðaverð hefur staðið í stað eða lækkað að raunvirði á ársgrundvelli undanfarna 10 mánuði. Íbúðaverð lækkaði einnig að raunvirði á árinu 2023 þegar miklar og skarpar vaxtahækkanir slógu á þenslu á fasteignamarkaði. Þá lækkaði íbúðaverð að raunvirði á ársgrundvelli í þrettán mánuði í röð, en 12 mánaða raunverðslækkunin mældist mest 6,42% í júlí 2023. Rýming Grindavíkurbæjar vegna jarðhræringa undir lok árs 2023 leiddi til aukinnar eftirspurnar á fasteignamarkaði sem stuðlaði að verðhækkunum á markaðnum þannig að íbúðaverð tók að hækka að raunvirði að nýju, þrátt fyrir hátt vaxtastig.

Greiningardeildir Arion banka og Landsbankans spá áframhaldandi raunverðslækkunum íbúðaverðs á þessu ári og því næsta í nýjum þjóðhagsspám fram til ársins 2028 sem gefnar voru út í síðari hluta aprílmánaðar. Báðar greiningardeildir gera hins vegar ráð fyrir að íbúðaverð taki að hækka að raunvirði að nýju á árinu 2028.

Mæla­­borð fyr­­ir vísi­­töl­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og á landsbyggðinni. Hægt er að nálgast mælaborðið með því að smella á hnappinn hér að neðan.