Verkefni slökkviliða árið 2024 voru 2.631 í heildina. Eru þar talin með bæði lögbundin verkefni slökkviliða og önnur verkefni sem slökkviliðin taka að sér.  Þetta er á meðal þess sem kemur fram í tölfræði úr útkallskýrslugrunni slökkviliða sem HMS hefur unnið tölfræðiupplýsingar úr fyrir árið 2024.

Slökkvilið landsins sinna fjölbreyttum og krefjandi verkefnum þegar kemur að slökkvi- og björgunarþjónustu sveitarfélaga. Dæmi um verkefni sem eru lögbundin eru m.a. slökkvistarf og reykköfun, björgun á fastklemmdu fólki t.d. vegna umferðarslysa, eldvarnareftirlit og forvarnir. Flest slökkvilið sinna einnig öðrum verkefnum, t.d. sjúkraflutningum, slökkvitækjaþjónustu og björgunarstörfum.

Fjölg­un bruna í bygg­ing­um

Slökkvilið landsins sinntu alls 265 útköllum vegna eldsvoða í byggingum árið 2024. Aukning er í verkefnum sem varða eldsvoða í byggingum og hafa þau aukist um  7 prósent á síðastliðnum fimm árum.

Eins og sjá má á grafinu hér að ofan hefur fjöldi fasteigna aukist hlutfallslega meira en fjöldi bruna í byggingum sem ýtir undir mikilvægi hertari reglna er varða brunavarnir í mannvirkjum.

Fjöldi út­kalla á hæsta for­gangi fleiri á lands­byggð­inni

Útköll vegna umferðaslysa hafa aukist um 11 prósent síðastliðin fimm ár.
Árið 2024 var fjöldi umferðaslysa þar sem slökkvilið voru kölluð á slysstað svipuð á höfuðborgarsvæðinu og á landsbyggðinni. Þó fjöldi tilfella sé svipaður þá eru tilfelli með hæsta forgang fleiri á landsbyggðinni eða um 34 prósent meiri.

Tveir lét­ust í tveim­ur að­­­skild­­um brun­­um í fyrra

Tveir létust á Íslandi í brunum árið 2024. Bæði tilfellin voru þar sem fólk dvelur, annarsvegar í heimahúsi og hins vegar á stofnun.

Heildarupphæð bættra brunatjóna árið 2024 nam 4,7 milljörðum króna og var 30 prósent lægri en árið 2023.

Árlega tekur HMS saman yfirlit yfir eignatjón vegna eldsvoða er byggir á gögnum frá tryggingafélögum. Niðurstöður úr þeirri samantekt má sjá á mynd hér að neðan, sem sýnir heildarumfang bættra brunatjóna frá tryggingafélögunum á hverju ári.

Hér að neðan sést skipting tjóna árið 2024 milli atvinnuhúsnæðis, heimila og annað/óskilgreint. Þar sést að atvinnuhúsnæði eru með stærstu upphæðirnar og flest tilfelli.

Markvisst hefur verið unnið að bættum brunavörnum á Íslandi síðustu áratugi. HMS mun halda áfram á  þeirri vegferð að bæta brunavarnir á Íslandi til að tryggja öryggi fólks og eignaöryggi.

Nauðsynlegt er að fólk hugi vel að brunavörnum í nærumhverfi sínu til að lágmarka líkur á bruna. HMS sinnir öflugu fræðslu og forvarnarstarfi á sviði brunavarna og inni á vefnum Vertu eldklár má nálgast  forvarnar- og fræðsluefni varðandi brunavarnir heimilisins.