Verkefni slökkviliða árið 2025 voru 2.542 í heildina. Þar eru  talin bæði lögbundin verkefni og önnur verkefni sem slökkviliðin taka að sér. Þetta kemur fram í tölfræði úr útkallskýrslugrunni slökkviliða sem HMS hefur unnið tölfræðiupplýsingar úr fyrir árið 2025.

Slökkvilið landsins sinna fjölbreyttum og krefjandi verkefnum þegar kemur að slökkvi- og björgunarþjónustu sveitarfélaga. Dæmi um verkefni sem eru lögbundin eru m.a. slökkvistarf og reykköfun, björgun á fastklemmdu fólki t.d. vegna umferðarslysa, eldvarnareftirlits og forvarnir. Flest slökkvilið sinna einnig öðrum verkefnum, t.d. sjúkraflutningum, slökkvitækjaþjónustu og björgunarstörfum.

Fjöldi út­kalla vegna um­ferða­slysa á hæsta for­gangi fleiri á lands­byggð­inni

Útköll vegna umferðaslysa voru 288 sem er fækkun um 18 prósent frá seinasta ári.

Árið 2025 var fjöldi umferðaslysa þar sem slökkvilið voru kölluð á slysstað svipuð á höfuðborgarsvæðinu og á landsbyggðinni. Þó fjöldi tilfella sé svipaður þá eru tilfelli með hæsta forgang fleiri á landsbyggðinni eða um 32 prósent útkalla á móti 9 prósent útkalla á höfuðborgarsvæðinu. Forgangur útkalla er flokkaður frá F1 til F4. Þar sem F1 og F2 eru tilfelli sem líf telst í hættu og ekið er á forgangsakstri.

Tvö manns­lát vegna bruna árið 2025

Tveir létust á Íslandi í brunum árið 2025. Báðir einstaklingarnir létust í sama brunanum. Um íkveikju í fjölbýlishúsi var að ræða.

Eldútköll hafa ekki verið færri síðan 2020. Útköll þar sem eldur er, eða talið vera, hefur fækkað um 19 prósent miðað við meðaltal síðustu fimm ára þar á undan.

Lög­bund­in hlut­verk slökkvi­liða

Verkefni slökkviliða árið 2025 voru 2.542 og þar af flokkast 1.012 undir lögbundin hlutverk slökkviliða. Það eru um 40 prósent af þeim verkefnum sem slökkviliðin sinntu. Eldvarnaeftirlit er ekki hluti af viðbragðs verkefnum slökkviliða og eru þar að leiðir ekki inn í þessum tölum. Önnur verkefni slökkviliða fela í sér m.a. viðbrögð við vatnstjónum, óveður, hreinsun, aðstoð við störf annarra viðbragðsaðila og fl. Ef horft er til meðaltals síðustu fimm ára má sjá að það er fækkun í verkefnum er falla undir lögbundin hlutverk um 17 prósent. Aftur á móti er aukning í öðrum verkefnum og hafa þau verið að aukast síðustu ár.

Við­vör­un­ar­kerfi (ekki eld­ur)

Brunaviðvörunarkerfi mannvirkja eru mikilvægur hluti af brunavörnum. Slík kerfi eru sett upp til að flýta fyrir uppgötvun elds, með því móti er viðbragðstími slökkviliðs styttri.  Þessi kerfi þarfnast eftirlits og viðhalds. Einn þáttur í starfsemi slökkviliða er viðbragð við eldútköllum. Haldið er sérstaklega utan um fjölda útkalla þar sem brunaviðvörunarkerfi fer af stað án þess að eldur sé til staðar og slökkvilið mætir á staðinn. Æskilegt er að slík útköll séu sem fæst vegna þess tíma og kostnaðar sem fer í óþarft viðbragð. Ánægjulegt er að sjá að slíkum útköllum hefur farið fækkandi og er 38 prósent fækkun miðað við meðaltal síðustu fimm ára.

Markvisst hefur verið unnið að bættum brunavörnum á Íslandi síðustu áratugi. HMS mun halda áfram á þeirri vegferð að stuðla að bættum brunavörnum til að tryggja öryggi fólks, eignir og umhverfi.

Nauðsynlegt er að fólk hugi vel að brunavörnum í nærumhverfi sínu til að lágmarka líkur á bruna. HMS sinnir öflugu fræðslu og forvarnarstarfi á sviði brunavarna, inn á vefnum Vertu eldklár má nálgast forvarnar- og fræðsluefni varðandi brunavarnir heimilisins.