Vísitala leiguverðs á höfuðborgarsvæðinu var 105,9 í janúar 2024 og hækkaði hún  um 0,3 prósent á milli mánaða. Á ársgrundvelli hefur vísitalan hækkað um 9,0 prósent frá því í maí í fyrra, sem er rúmlega tvöfalt hærra en sambærileg hækkun vísitölu kaupverðs á höfuðborgarsvæðinu.

Í janúar síðastliðnum tók HMS nýja vísitölu leiguverðs á höfuðborgarsvæðinu í notkun, en fyrsti útreikningur hennar miðast við maí 2023 og er gildi hennar þá 100.  Vísitalan, sem sjá má á mynd hér að ofan, sýnir breytingar á vegnu meðaltali fermetraverðs. Stuðst er við leigusamninga síðastliðinna tveggja mánaða við útreikning vísitölunnar.

Frá maí síðastliðnum hefur vísitalan hækkað um 5,9 prósent, sem samsvarar 9 prósenta hækkun á ársgrundvelli. Á sama tíma hefur íbúðaverð á höfuðborgarsvæðinu hækkað um 4,2 prósent á ársgrundvelli, samkvæmt nýjustu gildum frá vísitölu kaupverðs íbúða á höfuðborgarsvæðinu.

For­­send­­ur

Byggt er á leigusamningum um hefðbundnar íbúðir sem eru í eigu einstaklinga og fyrirtækja sem rekin eru í hagnaðarskyni. Reiknað er meðalfermetraverð í 6 flokkum eftir herbergjafjölda og niðurstöður vegnar saman með veltu síðustu 12 mánaða. Stuðst er við leigusamninga síðastliðna tvo mánuði, þannig byggir vísitalan í desember t.d. á leigusamningum í nóvember og desember.

Birtingu vísitölunnar er ætlað að varpa ljósi á þróun leiguverðs samkvæmt þeim gögnum sem liggja fyrir á hverjum tíma. HMS áskilur sér rétt til að endurskoða vísitöluna aftur í tímann í ljósi fyllri gagna eða fágaðri aðferðafræði. Vísitalan er ekki ætluð til að verðtryggja fjárskuldbindingar.

Öllum eru heimil afnot af fréttinni og meðfylgjandi gögnum en vinsamlegast getið heimildar.