Vísitala leiguverðs var 113,3 stig í maí 2024 og hækkaði hún um 3,2 prósent á milli mánaða. Á milli maímánaða 2023 og 2024 hefur vísitalan hækkað um 13,3 prósent, en til samanburðar mældist verðbólga 6,2 prósent á sama tímabili og vísitala íbúðaverðs hækkaði um 8,4 prósent.

Þróun leiguvísitölunnar frá maímánuði 2023 má sjá á mynd hér að neðan. Einnig er hægt að nálgast eldri og sameinaðar vísitölur  HMS á hms.is/visitolur.

12 mánaða hækkun vísitölunnar er nú orðin sambærileg því sem hún var árið 2017, en þá var hún á bilinu 12 til 14 prósent frá apríl til september. Á árunum 2011-2017 og 2018-2023 fór 12 mánaða hækkun vísitölunnar hins vegar aldrei yfir 11,1 prósent.

Þó er hækkun vísitölunnar lægri að raunvirði en hún var árið 2017. Í maí síðastliðnum var raunverðshækkun leiguvísitölunnar á ársgrundvelli um 7,2 prósent, en hækkunin var á bilinu 10 til 12 prósent árið 2017.

Leiguvísitalan sýnir breytingar á vegnu meðaltali fermetraverðs. Byggt er á leigusamningum um hefðbundnar íbúðir sem eru í eigu einstaklinga og fyrirtækja sem rekin eru í hagnaðarskyni. Reiknað er meðalfermetraverð í 6 flokkum eftir herbergjafjölda og niðurstöður vegnar saman með veltu síðustu 12 mánaða.  Stuðst er við leigusamninga síðastliðinna tveggja mánaða við útreikning vísitölunnar, svo maígildi hennar tekur mið af leigusamningum í apríl og maí.