Vísitala íbúðaverðs mældist 109,5 stig í nóvember og hækkaði um 0,83 prósent á milli mánaða. Vísitala íbúðaverðs hefur hækkað um 10,6 prósent á síðustu tólf mánuðum á sama tíma og verðbólga hefur mælst 4,8 prósent.

Á mynd hér að neðan má sjá 12 mánaða breytingu vísitölu íbúðaverðs ef hækkun síðustu þriggja mánaða yrði stöðug. Á síðustu þremur mánuðum hefur vísitalan hækkað um 0,7 prósent, en það gerir 3,0 prósenta hækkun á ársgrundvelli.

Taflan hér að neðan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Verð á fjöl­býl­um á höf­uð­borg­ar­svæð­inu helst stöðugt

Verð á fjölbýlum á höfuðborgarsvæðinu hefur haldist stöðugt síðustu þrjá mánuði, en þriggja mánaða verðbreyting á fjölbýlum á höfuðborgarsvæðinu mældist 0,28 prósent.

Mánaðarhækkun íbúðaverðs var mest hjá fjölbýlum á landsbyggðinni og næst mest hjá sérbýlum á höfuðborgarsvæðinu, en mánaðarhækkun þessara tveggja flokka nam yfir tveimur prósentustigum.  

Mæla­borð fyr­­ir vísi­­töl­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð. Einnig sýnir mælaborð undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri undirvísitölu íbúðaverðs á höfuðborgarsvæðinu og tekur gildið 100 í janúar 2024. Mælaborðið má finna á https://hms.is/gogn-og-maelabord/visitolur