Hlutverk Húsnæðis- mannvirkja- og skipulagsstofnunar er að vernda líf og heilsu manna, eignir og umhverfi með því að tryggja faglegan undirbúning mannvirkjagerðar og virkt eftirlit með gæðum, öryggi og heilnæmi. Að stuðla að stöðugleika á húsnæðismarkaði og tryggja almenningi aðgengi...

Húsnæðis- mannvirkja- og skipulagsstofnun

Skráðu þig á póstlista HMS og fáðu allar nýjustu fréttir sendar í pósthólfið þitt.

Póstlisti HMS

Fræðsla og forvarnir

Gögn og mælaborð

Brunavarnir

Burður

Byggingarreglugerð

Byggingarvörur

Fagaðilar í mannvirkjagerð

Fasteignaskrá

Húsnæðisáætlanir

Húsnæðisbætur og leigumál

Landeignaskrá

Lán til einstaklinga

Lán til lögaðila

Lífsferilsgreining (LCA)

Mannvirkjarannsóknasjóður - Askur

Mannvirkjaskrá

Markaðseftirlit

Rafmagnsöryggi

Rb-blöð

Skipulag

Stofnframlög

Umhverfismat

Þjónustuflokkar

Húsnæðisbætur

Lánavefur

Öryggi mannvirkja

Rafmagnsöryggisgátt

Sveitarfélagsgátt

Um HMS

Fréttir

Gjaldskrá HMS

Lög og reglugerðir

Umsóknir og eyðublöð

Útgefið efni

Vaxtatafla

Um helmingur nýrra íbúða og 85 prósent eldri íbúða hafa selst undir auglýstu söluverði að undanförnu

Aðeins 5 til 7 prósent íbúða hafa selst yfir auglýstu söluverði á síðustu mánuðum

Fasteignasalar segja áfram mjög algengt að verð sé lækkað í söluferli fasteigna

Sala íbúða undir auglýstu söluverði hefur orðið algengari að undanförnu og er nú áþekk því sem var árið 2019, áður en mikið líf færðist í markaðinn vegna vaxtalækkana. Talsvert algengara er að eldri íbúðir séu seldar undir auglýstu söluverði heldur en nýjar, en samt sem áður hefur um helmingur nýrra íbúða verið seldur undir auglýstu söluverði undanfarna mánuði. Þetta er meðal þess sem fjallað verður um í mánaðarskýrslu HMS fyrir nóvembermánuð sem gefin verður út fimmtudaginn 19. nóvember.

Hlutfall eldri íbúða sem selst undir auglýstu söluverði mælist nú hærra en árið 2019

Á sama tíma og hægt hefur á verðhækkunum á íbúðamarkaði hafa hlutfallslega fleiri íbúðir selst undir auglýstu söluverði. Á síðustu þremur mánuðum hafa að meðaltali tæplega 85 prósent eldri íbúða selst undir auglýstu verði, samanborið við um 75 prósent um síðustu áramót og um 63 prósent á haustmánuðum ársins 2024, þegar Grindavíkuráhrifin stóðu hvað hæst.

Á myndinni hér að neðan má sjá þriggja mánaða meðaltal af dreifingu kaupverðs eldri íbúða á höfuðborgarsvæðinu í samanburði við auglýst söluverð þeirra.

Hlutfall eldri íbúða sem selst undir auglýstu söluverði mælist nú litlu hærra en það gerði á árinu 2019, þegar það var að jafnaði um 81 prósent. Frá og með árinu 2020 lækkaði hlutfallið aftur á móti hratt, á sama tíma og kraftur færðist í verðhækkanir á markaðnum samhliða lækkandi vaxtastigi.

Önnur hver ný íbúð selst undir auglýstu söluverði

Sjaldgæfara er að nýjar íbúðir seljist undir auglýstu verði, en engu að síður hefur um það bil helmingur nýrra íbúða selst undir auglýstu söluverði undanfarna mánuði. Eins og meðal annarra íbúða hefur hlutfallið farið vaxandi frá miðju ári 2024.

Meiri sveiflur eru í hlutfallinu á milli mánaða meðal nýrra íbúða en annarra íbúða þar sem kaupsamningar um nýjar íbúðir eru talsvert færri en um aðrar íbúðir og hver kaupsamningur vegur því þyngra sem hlutfall af heildinni. Á myndinni hér að neðan má sjá þriggja mánaða meðaltal af dreifingu kaupverðs í samanburði við auglýst söluverð nýrra íbúða á höfuðborgarsvæðinu.

Sjö af hverjum tíu fasteignasölum telja algengt að verð íbúða sé lækkaði söluferli

Flestir fasteignasalar segja verð oft eða alltaf lækka í söluferli fasteigna. Það getur til að mynda falið í sér lækkun á auglýstu söluverði eða samþykki á kaupverði sem er lægra en auglýst söluverð. Líkt og sjá má á myndinni hér að neðan hefur algengi verðlækkana færst í aukana frá miðju ári 2025, þegar HMS hóf að kanna álit fasteignasala með þessum hætti, sem rímar vel við þróun hlutfalls íbúða sem seljast undir auglýstu söluverði.

Undanfarna mánuði hafa um 70 prósent fasteignasala talið að verð sé oft eða alltaf lækkað í söluferli á meðan einungis um 4 prósent segja það sjaldan eða aldrei lækkað. Um fjórðungur fasteignasala segir verð stundum lækkaði í söluferli.

Nóvemberkönnun HMS meðal fasteignasala var sú 19. af sinni gerð. Könnunin var lögð fyrir um 330 félagsmenn í Félagi fasteignasala og að þessu sinni bárust 90 svör. Svarhlutfallið var því rúmlega 27%.

Enn hækkar hlutfall íbúða sem selst undir auglýstu söluverði

Sveitarfélögin á Norðurlandi eystra búast við um 400 nýjum íbúum á ári næstu 10 árin

Áætluð lóðaúthlutun Akureyrarbæjar næstu 10 ár er umfram áætlaða þörf

Fyrirhugaðar breytingar á byggingareftirliti fela meðal annars í sér áhættumiðað eftirlit og notkunareftirlit

Hægt hefur á fólksfjölgun á Norðurlandi eystra undanfarin ár, líkt og annars staðar á landinu, en sveitarfélögin á svæðinu gera ráð fyrir áframhaldandi og stöðugri fólksfjölgun á næstu árum. Uppbygging íbúðarhúsnæðis hefur ekki haldið í við þá íbúðaþörf sem skapast hefur í landshlutanum undanfarin ár vegna fólksfjölgunar, en miðað við húsnæðisáætlanir þarf að byggja um 250 nýjar íbúðir á ári hverju til að mæta áætlaðri íbúðaþörf næstu árin. Þetta kom fram á vel sóttum fundi sem HMS og Tryggð byggð héldu á skrifstofu HMS á Akureyri mánudaginn 9. nóvember.

Uppbygging á Akureyri, mannvirkjaskrá, skipulagsmál, breytt byggingareftirlit og brunavarnir til umræðu

Berglind Ósk Guðmundsdóttir, bæjarstjóri Akureyrarbæjar, fjallaði um stöðu íbúðauppbyggingar í bænum. Í erindi sínu ræddi Berglind meðal annars yfirstandandi og fyrirhugaða uppbyggingu íbúðarhúsnæðis í bænum. Hún fjallaði jafnframt um þær forsendur sem Akureyrarbær leggur til grundvallar spá um íbúðaþörf í húsnæðisáætlun sinni.

Aðrir frummælendur á fundinum voru úr röðum HMS. Auður Ævarr Sveinsdóttir, verkefnastjóri mannvirkjaskrár, kynnti þróun mannvirkjaskrár og Ólafur Árnason, framkvæmdastjóri skipulags og umhverfismats, fór yfir það helsta sem er á döfinni í skipulagsmálum.

Jörundur Blöndal, teymisstjóri öryggis og eftirlits, fjallaði um fyrirhugaðar breytingar á byggingarreglugerð. Í erindi sínu fjallaði Jörundur meðal annars um tillögur að breyttu byggingareftirliti með áhættumiðuðu eftirliti og notkunareftirliti sem yrði í höndum óháðra skoðunarstofa.

Helga Einarsdóttir, teymisstjóri brunavarna og slökkviliða, fjallaði um starfsemi slökkviliða og þá ábyrgð sem sveitarfélög bera í þeim efnum. Í mælaborði slökkviliða á vef HMS má finna ýmsar fróðlegar upplýsingar um slökkvilið á Íslandi og starfsemi þeirra.

Gera ráð fyrir stöðugri fólksfjölgun á Norðurlandi eystra næstu árin  

Kristín Amalía Líndal, hagfræðingur, fjallaði um stöðu íbúðauppbyggingar og framtíðarhorfur á Norðurlandi eystra. Norðurland eystra er þriðji fjölmennasti landshlutinn á eftir höfuðborgarsvæðinu og Suðurlandi og þar hefur íbúum fjölgað um 11% frá árinu 2015. Samsetning fólksfjölgunar á svæðinu hefur þó breyst nokkuð undanfarin ár.

Eftir langt tímabil búferlaflutninga fólks frá Norðurlandi eystra til annarra svæða innanlands hafa fleiri sest að í landshlutann heldur en hafa flutt frá honum undanfarin ár. Aðflutningur fólks erlendis frá hefur hins vegar einnig aukist að umfangi, en hann var mest áberandi á árunum 2016 og 2017 þegar mikill uppgangur var í ferðaþjónustu og vinnuaflsfrekar framkvæmdir við uppbyggingu kísilversins á Bakka stóðu yfir.

Öll sveitarfélögin á Norðurlandi eystra skiluðu og staðfestu húsnæðisáætlun fyrir árið 2026. Samkvæmt þeim gera sveitarfélögin ráð fyrir áframhaldandi og stöðugri fólksfjölgun í landshlutanum næstu 10 ár. Miðspá um fólksfjölgun hljóðar upp á um 400 nýja íbúa á ári. Miðað við fólksfjölgun á Norðurlandi eystra á fyrri helmingi þessa árs má áætla að endanleg fjölgun á árinu lendi einhversstaðar á milli lágspár og háspá sveitarfélaganna.

Fólksfjölgun og breytingar á meðalheimilisstærð eru lykilbreytur þegar kemur að mati á íbúðaþörf. Uppbygging undanfarin ár hefur ekki haldið í við þá nýju íbúðaþörf sem skapast hefur í landshlutanum undanfarin ár, þó hægt hafi á fólksfjölgun að undanförnu.

Miðað við húsnæðisáætlanir er þörf á rúmlega 250 nýjum íbúðum á hverju ári næstu 10 árin á Norðurlandi eystra. Á fyrstu 10 mánuðum ársins urðu 150 nýjar íbúðir fullbúnar á svæðinu og því vantar talsvert upp á miðspána. Þegar upp er staðið ræðst raunveruleg íbúðaþörf þó af raunverulegri fólksfjölgun á árinu. Það þarf því að bíða og sjá hvernig tekst að mæta íbúðaþörf á Norðurlandi eystra í ár.

Næsti fundur HMS og Tryggðrar byggðar verður á Akranesi föstudaginn 13. nóvember kl. 11:45. Síðar í nóvember eru fyrirhugaðir fundir á Sauðárkróki, Selfossi, í Reykjanesbæ og Reykjavík. Fundirnir eru opnir öllum.

Áætla að byggja þurfi um 250 nýjar íbúðir á ári til að mæta íbúðaþörf á Norðurlandi eystra

Samþykktar voru 26 umsóknir um hlutdeildarlán að fjárhæð samtals um 367 milljónir króna

Samþykktum umsóknum um hlutdeildarlán fjölgaði um rúm 60% miðað við október í fyrra

Flest lán voru veitt vegna íbúðakaupa í Hafnarfirði

HMS hefur lokið úthlutun hlutdeildarlána í október. Alls voru 26 umsóknir samþykktar og nam heildarfjárhæð lánsvilyrða um 367 milljónum króna sem gerir meðalfjárhæð samþykktra lána um 14 milljónir króna.

Til samanburðar voru 16 umsóknir samþykktar í október í fyrra fyrir samtals um 182 milljónir króna. Samþykktum umsóknum fjölgaði því um rúm 60% milli ára og heildarfjárhæð lánsvilyrða rúmlega tvöfaldaðist.

Flest lán vegna íbúðakaupa í Hafnarfirði

Af 26 samþykktum umsóknum í október voru 21 vegna íbúðakaupa á höfuðborgarsvæðinu og fimm utan þess. Flestar voru vegna kaupa í Hafnarfirði, eða alls 12, og sjö vegna kaupa í Reykjavík.

Í 25 af 26 samþykktum umsóknum lá fyrir samþykkt kauptilboð.

Fjölda samþykktra umsókna og fjárhæð lánsvilyrða eftir svæðum má sjá í töflu hér að neðan.

Landssvæði | Fjöldi umsókna | Fjárhæð (milljónir króna)

Rúmlega fjórir milljarðar króna samþykktir á árinu

Á fyrstu tíu mánuðum ársins hafa alls 286 umsóknir um hlutdeildarlán verið samþykktar og nemur samanlögð fjárhæð þeirra um 4,2 milljörðum króna. Fjöldi samþykktra umsókna er því þegar orðinn meiri en á öllu síðasta ári þegar samþykktar voru 157 umsóknir.

Eftirspurn eftir hlutdeildarlánum var mikil á fyrri hluta ársins og var jafnan umfram það fjármagn sem var til úthlutunar. Frá mars til júní þurfti því að velja af handahófi úr hópi umsókna sem uppfylltu öll skilyrði lánanna. Í júlí tókst hins vegar að vinna upp uppsafnaða eftirspurn og hefur ekki þurft að grípa til útdráttar síðan.

Hlutdeildarlán eru veitt til kaupa á nýjum íbúðum og eru ætluð fyrstu kaupendum og þeim sem ekki hafa átt fasteign síðustu fimm ár og eru undir tilteknum tekjumörkum. Markmið lánanna er að aðstoða kaupendur við að komast inn á húsnæðismarkaðinn með því að brúa bilið við fasteignakaup.

Úthlutað er í hverjum mánuði og er nú opið fyrir umsóknir vegna úthlutunar í nóvember.

Nánari upplýsingar um hlutdeildarlán og umsóknarferlið má finna á Ísland.is.

HMS úthlutar 26 hlutdeildarlánum í október

Ný brunavarnaáætlun Slökkviliðs Þingeyjarsveitar hefur verið samþykkt og gildir í fimm ár

Starfssvæði slökkviliðsins nær yfir 12.000 ferkílómetra

Nú eru 74% slökkviliða með virka brunavarnaáætlun

Þann 22. október sl. var ný brunavarnaáætlun Slökkviliðs Þingeyjarsveitar samþykkt. Áætlunin var samþykkt af sveitarstjórn Þingeyjarsveitar og HMS. Brunavarnaáætlun er öflugt tæki til að skapa heildarsýn yfir starfsemi og ástand slökkviliðsins og hversu vel það er í stakk búið til að takast á við hættur á sínu starfssvæði til að vernda líf og eignir manna.

Í brunavarnaáætluninni kemur fram að starfssvæði slökkviliðs Þingeyjarsveitar er yfir 12.000 ferkílómetrar að stærð. Stærstu áhætturnar í sveitarfélaginu eru Vaðlaheiðargöng, virkjanir og stór hótel. Einnig er talsverð áhætta vegna hópslysa í sveitarfélaginu vegna mikillar umferðar á ferðamannastöðum. Þetta kallar á öflugt, vel mannað og vel þjálfað slökkvilið. Hér má lesa brunavarnaáætlunina í heild:

Brunavarnaáætlun Þingeyjarsveitar samþykkt.pdf

Brunavarnaáætlun Slökkviliðs Þingeyjarsveita

Hörður Sigurðsson slökkviliðsstjóri Þingeyjarsveitar sagði við þetta tækifæri:

„Þingeyjarsveit hefur samþykkt brunavarnaráætlun sveitarfélagsins. Öflug og vel ígrunduð brunavarnaráætlun er grundvallarþáttur í því að tryggja öryggi íbúa, mannvirkja og starfsemi sveitarfélagsins. Þetta á ekki síst við í víðfeðmu og dreifbýlu sveitarfélagi eins og Þingeyjarsveit, þar sem byggð er dreifð, vegalengdir miklar og viðbragðstími getur verið lengri en í þéttbýlli sveitarfélögum. Við slíkar aðstæður skiptir markvisst skipulag brunavarna, mannafla, búnaðar og viðbragðsgetu sérstaklega miklu máli.

Við gerð brunavarnaráætlunarinnar naut Þingeyjarsveit góðrar aðstoðar og faglegrar ráðgjafar starfsmanna brunavarnarsviðs HMS. Sveitarfélagið vill koma á framfæri sérstökum þökkum til starfsmanna sviðsins fyrir þeirra mikilvæga framlag, leiðbeiningar og gott samstarf við gerð áætlunarinnar.“

74 prósent slökkviliða með virka brunavarnaáætlun

Á þessu ári hafa einnig verið samþykktar brunavarnaáætlanir hjá Brunavörnum Suðurnesja, Brunavörnum Árnessýslu, Slökkviliði Múlaþings og Slökkviliði Langanesbyggðar. Hlutfall slökkviliða landsins með virka brunavarnaáætlun er komið upp í 74 prósent og er markmiðið að 80 prósent slökkviliða séu með samþykkta brunavarnaáætlun fyrir árslok. Hlutfall landsmanna með virka brunavarnaáætlun er komið upp í 96 prósent og hefur aldrei verið hærra. Í byrjun árs 2026 voru um 90 prósent landsmanna með virka brunavarnaáætlun.

Að hafa samþykktar brunavarnaáætlanir er mikilvægt hagsmunamál fyrir íbúa landsins, þar sem þær lýsa viðbúnaði slökkviliða og eiga þar með að tryggja betra öryggi.

HMS óskar Slökkviliði Þingeyjarsveitar og íbúum sveitarfélagsins innilega til hamingju með nýja brunavarnaáætlun.

Ný brunavarnaáætlun Þingeyjarsveitar tekur gildi

Tilkynning til námsmanna

Póstlisti HMS

Útgáfuáætlun

Póstlisti HMS

Útgáfuáætlun

Fleiri fréttir

Enn hækkar hlutfall íbúða sem selst undir auglýstu söluverði

Áætla að byggja þurfi um 250 nýjar íbúðir á ári til að mæta íbúðaþörf á Norðurlandi eystra

HMS úthlutar 26 hlutdeildarlánum í október

Ný brunavarnaáætlun Þingeyjarsveitar tekur gildi

Fleiri fréttir

Enn hækkar hlutfall íbúða sem selst undir auglýstu söluverði

Áætla að byggja þurfi um 250 nýjar íbúðir á ári til að mæta íbúðaþörf á Norðurlandi eystra

HMS úthlutar 26 hlutdeildarlánum í október

Ný brunavarnaáætlun Þingeyjarsveitar tekur gildi