Hlutverk Húsnæðis- mannvirkja- og skipulagsstofnunar er að vernda líf og heilsu manna, eignir og umhverfi með því að tryggja faglegan undirbúning mannvirkjagerðar og virkt eftirlit með gæðum, öryggi og heilnæmi. Að stuðla að stöðugleika á húsnæðismarkaði og tryggja almenningi aðgengi...

Húsnæðis- mannvirkja- og skipulagsstofnun

Skráðu þig á póstlista HMS og fáðu allar nýjustu fréttir sendar í pósthólfið þitt.

Póstlisti HMS

Fræðsla og forvarnir

Gögn og mælaborð

Brunavarnir

Burður

Byggingarreglugerð

Byggingarvörur

Fagaðilar í mannvirkjagerð

Fasteignaskrá

Húsnæðisáætlanir

Húsnæðisbætur og leigumál

Landeignaskrá

Lán til einstaklinga

Lán til lögaðila

Lífsferilsgreining (LCA)

Mannvirkjarannsóknasjóður - Askur

Mannvirkjaskrá

Markaðseftirlit

Rafmagnsöryggi

Rb-blöð

Skipulag

Stofnframlög

Umhverfismat

Þjónustuflokkar

Húsnæðisbætur

Lánavefur

Öryggi mannvirkja

Rafmagnsöryggisgátt

Sveitarfélagsgátt

Um HMS

Fréttir

Gjaldskrá HMS

Lög og reglugerðir

Umsóknir og eyðublöð

Útgefið efni

Vaxtatafla

Á þriðja ársfjórðungi voru gefin út 18 álit eða ákvarðanir á grundvelli laga um umhverfismat framkvæmda og áætlana

Fiskeldi var algengasti flokkur framkvæmdaáforma, þar á eftir komu vatnsaflsvirkjanir

Flest áform voru á Suðurlandi og þar á eftir á Vestfjörðum

Á þriðja ársfjórðungi (júlí, ágúst, september) voru gefin út 18 álit eða ákvarðanir á grundvelli laga um umhverfismat framkvæmda og áætlana. Þar af voru tíu mál sem sneru að ákvörðun um matsskyldu, þrjú álit um matsáætlun og fimm álit um umhverfismat. 

Fiskeldi var algengasti flokkurinn af tegund framkvæmdar. Þar af voru þrjú mál sem varða landeldi og tvö sjókvíaleldi. Þrjú mál voru í flokknum vatnsaflsvirkjanir. 

Þegar landshlutar eru skoðaðir má sjá að flest mál eru á Suðurlandi og þar á eftir á Vestfjörðum. 

Álit og ákvarðanir sem voru gefin út í september mánuði

Hvalárlína 1 og Miðdalslína 1, viðbót við matsáætlun – álit um matsáætlun

Landsnet hefur ákveðið að bæta við tveimur valkostum inn í umhverfismat Hvalárlínu 1 og Miðdalslínu 1. Annars vegar verður tekinn til skoðunar sá kostur að Hvalárlína 1 geti verið loftlína alla leið og hins vegar nýr kostur um legu Miðdalslínu 1.

Tunguvirkjun í Keldnalæk – ákvörðun um matsskyldu

Afl og orka ehf. áformar að reisa allt að 3 MW vatnsaflsvirkjun í Keldnalæk í Rangárþingi ytra sem virkjar 8 m3/s rennsli með 40 m fallhæð og er árleg raforkuframleiðsla áætluð um 19 GWst. Framkvæmdin felur m.a. í sér byggingu stíflu, stöðvarhúss, lagningu 3,5 km langs vegar og 1,4 km langrar aðrennslispípu. Gert er ráð fyrir 3,5 ha inntakslóni neðst í Keldnalæk og verður vatni lækjarins veitt í Eystri-Rangá um 1,5 km neðan við núverandi ármót Keldnalækjar og Eystri-Rangár

Skipting Eyrarhlíðar í Dýrafirði í tvö eldissvæði – ákvörðun um matsskyldu

Arctic Sea Farm áformar að skipta eldissvæðinu Eyrarhlíð í Dýrafirði í tvö eldissvæði, þ.e. Eyrarhlíð I og Eyrarhlíð II. Svæðið er í dag eitt eldissvæði en er þó rekið sem tvær aðskildar eldiseiningar. Með breytingunni fær hvor eining sinn eigin hvíldartíma, en bæði svæðin yrðu þó ávallt hvíld samtímis í minnst 30 daga.

Aukin efnistaka úr Kiðafellsnámu í Hvalfirði – ákvörðun um matsskyldu

Um er að ræða breytingu á gildandi leyfi til efnistöku af hafsbotni í Kiðafellsnámu í Hvalfirði. Björgun-Sement (áður Björgun ehf.) hyggst sækja um leyfi fyrir allt að 5.000.000 m³ efnistöku í stað 1.667.000 m³ af lausum jarðefnum sem núgildandi leyfi kveður á um.

Aukin framleiðslugeta Silfurstjörnunnar á Núpsmýri – ákvörðun um matsskyldu

Fiskeldi hefur verið rekið í eldisstöðinni Núpsmýri í áratugi. Fyrirhuguð breyting felur í sér aukningu á heimiluðu framleiðslumagni úr 3000 t ári í 3800 t innan núverandi mannvirkja.

Sjá má öll mál frá júlí mánuði hér og öll mál frá ágúst mánuði hér

Skipulagsdagurinn 2026 fer fram þann 5. nóvember, kl 9-16 í Háteig á Grandhótel og í beinu streymi. Fundarstjóri verður Bergsteinn Sigurðsson.

Skipulagsdagurinn er árleg ráðstefna Húsnæðis-, mannvirkja- og skipulagsstofnunar og Sambands íslenskra sveitarfélaga um skipulagsmál.

Dagskrá ársins verður fjórskipt með pallborðsumræðum í hverjum hluta.

Dagskrá dagsins skiptist niður í fjóra hluta:

Samþætting skipulagsmála og húsnæðisáætlana

Staða og þróun skipulagsmála og landnýtingar

Aðlögun byggðar að loftslagsbreytingum

Menningarlandslag, ásýnd byggðar í dreifbýli og þéttbýli

Áhersla á umræður og tíma fyrir spjall í hléum

Í lok hvers hluta verða pallborðsumræður og tekið við spurningum úr sal. Fjölbreyttur hópur frummælenda og sérfræðinga mun koma að pallborðsumræðum. Þá mun gefast góður tími í kaffihléum fyrir gesti til að spjalla saman.

Fagfólk, kjörnir fulltrúar og allt áhugafólk um skipulag er hvatt til að taka daginn frá. Þátttökugjald er 10.000 krónur en innifalin er morgunhressing, hádegisverður og síðdegishressing. Þátttökugjald fyrir nema er 5.000 krónur.  

Nánari dagskrá verður auglýst þegar nær dregur.  

Skráning er hafin á Skipulagsdaginn 2026

HMS tekur nýja rafmagnsöryggisgátt í fulla notkun 12. október

Nýja gáttin einfaldar ferla, eykur sjálfvirkni og bætir rekjanleika upplýsinga

Frá 12. október verða allar nýjar þjónustubeiðnir og lokatilkynningar skráðar á rok.hms.is

Mánudaginn 12. október tekur HMS nýja rafmagnsöryggisgátt í fulla notkun. Um er að ræða stórt skref í stafrænni þjónustu á sviði rafmagnsöryggis og markar dagurinn ákveðin kaflaskil í rafmagnsöryggismálum hér á landi.

Rafmagnsöryggisgátt hefur um árabil gegnt mikilvægu hlutverki í samskiptum HMS, löggiltra rafverktaka, dreifiveitna og skoðunarstofa. Gáttin var á sínum tíma sett upp sem miðlægt upplýsingakerfi með það að markmiði að auðvelda rafræn skil upplýsinga og samskipti þeirra aðila sem koma að rafmagnsöryggismálum.

Gamla gáttin hefur þjónað þessum tilgangi vel en er komin til ára sinna. Með tímanum hafa óskir notenda um endurbætur og nýja virkni jafnframt aukist. Því þótti tímabært að taka næsta skref og byggja upp nýja lausn frá grunni sem tekur betur mið af nútímakröfum um stafræna þjónustu.

Undirbúningur nýrrar rafmagnsöryggisgáttar hefur staðið síðan 2024 en þá settu SI og Samorka sig í samband við HMS og vöktu athygli á nauðsyn þess að uppfærslu væri þörf. HMS tók vel í málið og hóf þarfagreiningu og hönnun nýrrar lausnar í samráði við hagaðila áður en eiginleg þróunarvinna hófst og hefur verkefnið verið unnið í áföngum síðan.

Markmiðið með nýja kerfinu er meðal annars að einfalda ferla, bæta rekjanleika upplýsinga, auka sjálfvirkni og bæta upplifun þeirra sem nota kerfið. Gáttin heldur utan um ferli mála á einum stað, meðal annars skráningu þjónustubeiðna og lokatilkynninga, afgreiðslu dreifiveitna og HMS og skráningu og framkvæmd skoðana ásamt rekjanlegum samskiptum þeirra sem að þeim koma.

Með gangsetningu hennar í dag hefst því nýr kafli í rafrænu utanumhaldi og samskiptum á sviði rafmagnsöryggis hér á landi.

Rafverktakar hafa tekið þátt í prófunum

Þann 15. júní 2026 hófst prófunarferli þegar SART í samstarfi við HMS sendi út tölvupóst til allra sinna félagsmanna og óskaði eftir þátttöku þeirra í prófunum á kerfinu. Þann 6. október 2026 fengu svo allir löggiltir rafverktakar á skrá HMS tölvupóst þar sem þeim var tilkynnt opnun nýju gáttarinnar til prófunar. Markmiðið var að fá sem flesta til að prófa kerfið og koma á framfæri ábendingum áður en það færi í fulla notkun svo unnt væri að gera síðustu lagfæringar.

Fimmtudaginn 8. október hélt HMS jafnframt kynningar- og kennslufund fyrir rafverktaka í húsakynnum Rafmennt þar sem farið var yfir vinnuferli og virkni nýju gáttarinnar. Fundinum var streymt og hann tekinn upp svo hægt er að nálgast kynninguna hér.

Ný mál fara í nýju gáttina frá 12. október

Frá og með 12. október 2026 verður ekki lengur hægt að skrá nýjar lokatilkynningar eða þjónustubeiðnir í eldri rafmagnsöryggisgátt HMS. Ný mál verða þess í stað skráð í nýju gáttina.

Mál sem þegar hefur verið skilað inn í eldri gáttina verða áfram afgreidd þar uns vinnslu þeirra er lokið.

Nýja rafmagnsöryggiskerfið er aðgengilegt á rok.hms.is.

HMS hvetur rafverktaka til að kynna sér nýju gáttina og koma ábendingum um það sem betur má fara á framfæri við stofnunina. Ábendingar og fyrirspurnir vegna gáttarinnar má senda á rafmagn@hms.is.

HMS býður jafnframt upp á fjarfundi á Teams þar sem farið verður yfir notkun gáttarinnar og gefinn tími fyrir spurningar. Fundirnir verða kl. 12:00 til 13:00:

Skráning fer fram með tölvupósti á rafmagn@hms.is og skal taka fram á hvaða fund aðilar vilja sækja.

Ný rafmagnsöryggisgátt HMS tekin í notkun

Ný brunavarnaáætlun Slökkviliðs Múlaþings hefur verið samþykkt og gildir í fimm ár

Aldrei áður hefur verið brunavarnaáætlun í gildi á þessu svæði

Nú eru 95% landsmanna með virka brunavarnaáætlun og hefur hlutfallið aldrei verið hærra

Í sumar var brunavarnaáætlun Múlaþings samþykkt af sveitarstjórn og HMS. Þetta var jafnframt í fyrsta skipti sem brunavarnaáætlun er samþykkt á starfssvæði Slökkviliðs Múlaþings. Brunavarnaáætlanir eru öflugt tæki til að skapa heildstæða yfirsýn yfir starfsemi og ástand slökkviliðs og hversu vel í stakk búið það er að takast á við hættur á sínu svæði í þeim tilgangi að vernda líf og eignir manna.

Haraldur Geir Eðvaldsson slökkviliðsstjóri sagði af þessu tilefni:

,,Það er mikið gleðiefni að brunavarnaáætlun fyrir starfsvæði Slökkviliðs Múlaþings skuli loksins hafa tekið gildi. Vinnan við áætlunina hefur tekið langan tíma og verið á köflum erfið og snúin. Það var mikið framfaraskref þegar HMS tók upp rafrænt umhverfi til að vinna áætlunina og samstarf við starfsmenn brunavarnasviðs HMS hefur verið mjög gott. Brunavarnaáætlun er mikilvægt gagn fyrir íbúa, slökkviliðið og þá sem stýra málaflokknum hjá sveitarfélögunum. Áætlunin lýsir stöðunni og gefur tækifæri til að horfa til úrbóta og jafnframt ýta upp því sem vel er gert og sinnt“.

95 prósent landsmanna með virka brunavarnaáætlun

Á þessu ári hafa einnig verið samþykktar brunavarnaáætlanir hjá Brunavörnum Suðurnesja og Brunavörnum Árnessýslu. Hlutfall slökkviliða landsins með virka brunavarnaáætlun er komið upp í 68 prósent og er markmiðið að 80 prósent slökkviliða séu með samþykkta brunavarnaáætlun fyrir árslok. Hlutfall landsmanna með virka brunavarnaáætlun er komið upp í 95 prósent og hefur aldrei verið hærra. Í byrjun árs 2026 voru um 90 prósent landsmanna með virka brunavarnaáætlun.

Að hafa samþykktar brunavarnaáætlanir er mikilvægt hagsmunamál fyrir íbúa landsins, þar sem þær lýsa viðbúnaði slökkviliða og eiga þar með að tryggja betra öryggi.

HMS óskar Slökkviliði Múlaþings og íbúum sveitarfélaganna innilega til hamingju með nýja brunavarnaáætlun.

Ný brunavarnaáætlun Múlaþings tekur gildi

Tilkynning til námsmanna

Póstlisti HMS

Útgáfuáætlun

Póstlisti HMS

Útgáfuáætlun

Fleiri fréttir

Umhverfismat á þriðja ársfjórðungi

Skráning er hafin á Skipulagsdaginn 2026

Ný rafmagnsöryggisgátt HMS tekin í notkun

Ný brunavarnaáætlun Múlaþings tekur gildi

Fleiri fréttir

Umhverfismat á þriðja ársfjórðungi

Skráning er hafin á Skipulagsdaginn 2026

Ný rafmagnsöryggisgátt HMS tekin í notkun

Ný brunavarnaáætlun Múlaþings tekur gildi