Alls eru 6.954 íbúðir í byggingu um land allt, samkvæmt mælaborði íbúða í byggingu. Nálægt 60% af þeim eru staðsettar á höfuðborgarsvæðinu  og um 25% í sveitarfélögum í nágrenni þess. Þetta sést á Mælaborði íbúða í byggingu, sem finna má á heimasíðu HMS.

Mælaborð íbúða í byggingu birtir samantekin gögn og talningar fyrir íbúðarhúsnæði úr Mannvirkjaskrá HMS. Mannvirkjaskrá nýtir m.a. gögn úr fasteignaskrá ásamt gögnum frá sveitarfélögum.

Hlut­fall sér­býla höf­uð­borg­ar­svæð­inu fer lækk­andi

Um 78 prósent af íbúðum í byggingu á landinu eru í fjölbýlum og 22 prósent í sérbýlum. Sérbýlin eru í enn meiri minnihluta ef höfuðborgarsvæðið er skoðað sérstaklega þar sem 8 prósent af 4.109 íbúðum í byggingu eru sérbýli og 92 prósent í fjölbýlum. Hlutfall sérbýla mun því lækka á höfuðborgarsvæðinu þegar íbúðir í byggingu verða fullbúnar, en sérbýli eru nú 24 prósent af öllum fullbúnum íbúðum.

Mest er verið að byggja meðalstórar íbúðir í fjölbýlum sem eru 70-110 fermetrar á stærð en af sérbýlum í byggingu er algengasta stærðin 150-210 fermetrar. Samanborið við fullbúnar íbúðir þá sést að sérbýli í byggingu á höfuðborgarsvæðinu eru í stærri kantinum en 88 prósent af þeim eru yfir 150 fermetra að stærð.

Fleiri en minni sér­býli utan höf­uð­borg­ar­svæð­is­ins

Utan höfuðborgarsvæðis eru jafnari hlutföll milli sérbýla og fjölbýla. Alls eru 1.634 íbúðir í fjölbýlum í byggingu utan höfuðborgarsvæðisins, en 1.211 sérbýli. Eins og á höfuðborgarsvæðinu er algengasta stærð fjölbýla 70-110 fermetrar en sérbýlin í byggingu eru talsvert minni þar sem um 66 prósent sérbýla í byggingu eru minni en 150 fermetrar.