Alls voru 165 nýjar lóðir staðfestar í Fasteignaskrá HMS í október og er það talsverð fjölgun frá fyrri mánuði eða rúmlega 100 fleiri. Þetta er einnig annar mesti fjöldi á árinu en í maí voru skráðar 218 nýjar lóðir.

Fjöldi ný­­skráðra lóða um allt land eft­­ir mán­uð­um og flokk­um

Myndin hér að ofan sýnir mánaðarlegar tölur um fjölda nýskráðra lóða eftir öllum flokkum. Í október voru 70 íbúðarhúsalóðir skráðar, 23 atvinnuhúsalóðir og 22 sumarhúsalóðir. Lóðir skráðar sem annað land eða einfaldlega lóð voru 36 talsins í október, en líklegt er að þessar lóðir breyti um gerð þegar fram líða stundir og verði skráðar sem atvinnu-, sumarhúsa- eða íbúðarlóðir.

Flest­ar nýj­ar íbúð­ar­húsa­lóð­ir skráð­ar í Mos­fells­bæ

Flestar nýjar íbúðarhúsalóðir voru staðfestar í Mosfellsbæ í október eða alls 33 lóðir. Mosfellsbær er staðsett ofarlega á lista yfir flestar íbúðarhúsalóðir á árinu eftir sveitarfélögum, en einungis nágrannasveitarfélögin Ölfus og Árborg sem og Akureyrarbær hafa stofnað fleiri íbúðarhúsalóðir á árinu.

Átta nýjar jarðir voru staðfestar í október, sem er nokkuð meira heldur en síðustu mánuði, en alls hafa 14 jarðir verið skráðar frá áramótum. Nýjar jarðir verða til þegar jörðum er skipt upp og sveitarfélag samþykkir að skrá nýju eignina sem jörð ef ætlunin er að fara í jarðrækt eða landbúnað. Í þessu tilviki var ein stór jörð staðsett á Suðurlandi skipt upp í átta hluta og fengu allir hlutar skráninguna jörð.

Þrjú vegsvæði voru staðfest í október í Dalabyggð og Rangárþingi eystra. Auk þess voru þrjár bílalóðir staðfestar í október í Garðabæ og Hveragerðisbæ.