Skráningu um eldvarnir leiguíbúða er ábótavant samkvæmt upplýsingum sem HMS hefur unnið úr Leiguskrá. Tæp 17 prósent allra leigusamninga í Leiguskrá sem tóku gildi á fyrstu þremur mánuðum ársins eru ekki með reykskynjara skráðan í íbúðinni.

Upp­lýs­ing­ar um bruna­varn­ir hafa batn­að

Stafræn leiguskrá HMS hefur að geyma upplýsingar um brunavarnir, þar sem leigusalar geta skráð fjölda reykskynjara í leiguíbúðum sínum. Þessar upplýsingar hafa orðið betri eftir því sem leigusamningum hefur fjölgað í leiguskrá, en leigusalar hafa í auknum mæli skráð þann fjölda reykskynjara sem eru til staðar í íbúðinni í nýjum leigusamningum.

Lögum samkvæmt eiga allar leiguíbúðir að fullnægja kröfum um brunavarnir, en til þess þurfa þær að innihalda að minnsta kosti einn reykskynjara fyrir hverja 80 fermetra á hverri hæð, auk slökkvitækis. Brunavarnir eru á ábyrgð leigusala, sem eiga að sjá til þess að reykskynjarar og slökkvitæki séu í lagi í upphafi leigutímabils.

Myndin hér að neðan sýnir skráningu á reykskynjurum eftir upphafsdag leigusamninga í leiguskrá. Samkvæmt henni hafa nú yfir 80 prósent nýrra leigusamninga reykskynjara skráðan í íbúðinni.

Skrán­ing reyk­skynjara eft­ir upp­haf leigu­samn­ings í Leigu­skrá

Líkt og myndin sýnir hefur hlutfall skráðra reykskynjara í nýjum leigusamningum ekki hækkað á síðustu mánuðum. Frá áramótum eru um 17 prósent þeirra án skráðs reykskynjara. Þetta er töluvert hærra hlutfall en kemur fram í árlegri skoðanakönnun sem HMS framkvæmir um brunavarnir á heimilum landsins, en samkvæmt henni eru engir reykskynjarar til staðar í 4,9 prósent íbúða á leigumarkaði.

Hátt hlutfall leiguíbúða án skráðs reykskynjara gefa því vísbendingu um handvömm í skráningu á brunavörnum heimila. Sömuleiðis er skráningu á slökkvitækjum og eldvarnarteppum í leiguhúsnæði ábótavant, þar sem fáir nýir leigusamningar tilgreina fjölda slíkra tækja í leiguíbúðinni. Í því tilefni minnir HMS leigusala á mikilvægi þess að brunavarnir séu í lagi og að gerð sé grein fyrir þeim í húsaleigusamningum.

Kynn­ing­ar­efni fyr­ir Dag reyk­skynjar­ans 2023

HMS sinnir öflugu fræðslu og forvarnarstarfi á sviði brunavarna, inn á vefnum Vertu eldklár má nálgast  forvarnar- og fræðsluefni varðandi brunavarnir heimilisins.