Allir geta veitt umsögn og komið á framfæri sínum sjónarmiðum um framkvæmdir og umhverfismat þeirra. Umsagnir sem berast á kynningartíma matsáætlunar og umhverfismatsskýrslu eru hluti þeirra gagna sem HMS tekur afstöðu til þegar unnið er að áliti stofnunarinnar um matsáætlun og umhverfismat framkvæmdar.

Á Skipulagsgátt, samráðsgátt um skipulagsmál, mat á umhverfisáhrifum og framkvæmdaleyfi, má finna upplýsingar um mál í vinnslu, gera athugasemdir við mál á kynningartíma og nálgast endanleg gögn og afgreiðslu mála.

Kynning og samráð við almenning við vinnslu umhverfismatsskýrslu fer eftir aðstæðum í hverju tilviki, í samræmi við það sem lýst er í matsáætlun fyrir viðkomandi framkvæmd.

Almennt geta þeir sem eiga lögvarða hagsmuni tengda ákvörðun um hvort framkvæmdir í flokki B skuli háðar umhverfismati, kært ákvörðun til úrskurðanefndar umhverfis- og auðlindamála. Það á til dæmis við landeigendur, nágranna, veiðifélög eða umhverfisverndar-, útivistar-, og hagsmunasamtök sem uppfylla tiltekin skilyrði.

Álit HMS um mat á umhverfisáhrifum framkvæmdar og álit stofnunarinnar um matsáætlun eru ekki kæranleg. Hins vegar er þeim sem eiga lögvarða hagsmuni, þar með talið umhverfisverndar-, útivistar- og hagsmunasamtökum, heimilt að kæra leyfi vegna framkvæmda sem falla undir lög um umhverfismat framkvæmda og áætlana, til úrskurðarnefndar umhverfis- og auðlindamála.