Merkjalýsing er skjal sem lýsir landfræðilegri afmörkun fasteignar auk annarra og nánari upplýsinga sem skilgreind eru í reglugerð svo sem upplýsingar um eignamörk, skráningu fasteignar, hvaða eignir eiga merki saman, hvert eignarhlutfall er í séreignar- og sameignarskikum auk upplýsinga um réttindi tengd fasteign. Tilgangur merkjalýsingar er að lýsa merkjum á þann hátt að þau séu skýr og að upplýsingar um merki og eignir séu settar fram hvorutveggja á myndrænan hátt og í texta en jafnframt að samræma og formfesta vinnubrögð merkjalýsenda. Merkjalýsing getur snúið að afmörkun fasteignar í heild eða að hluta. Þá getur ein og sama merkjalýsingin fjallað um margar fasteignir.

Þeir einir mega taka að sér gerð merkjalýsingar sem fengið hafa til þess sérstakt leyfi ráðherra. Hér er listi yfir einstaklinga með gilt leyfi.

Merkjalýsandi skal sjá til þess að upplýsingar í merkjalýsingu séu réttar og auðskiljanlegar, að efni í merkjalýsingu lýsi þeim breytingum sem verið er að framkvæma á merkjum og eftir atvikum skráningu fasteigna. Merkjalýsanda ber að gæta þess að í merkjalýsingu komi fram allar nauðsynlegar upplýsingar og að hún sé réttilega gerð miðað við þau gögn sem lögð eru til grundvallar og sé í samræmi við lög og reglugerðir.