Með nýrri lagasetningu sem tók gildi um síðustu mánaðarmót hefur Alþingi breytt sértækum húsnæðisstuðningi til Grindvíkinga. Breytingarnar fela í sér lengri gildistíma stuðningsins, hærra hlutfall niðurgreidds húsnæðiskostnaðar og hærri hámarksstuðning fyrir hver heimili.

Gildistími húsnæðisstuðningsins til Grindvíkinga er nú til 31. ágúst samkvæmt nýju lögunum, í stað 29. febrúar. Nýju lögin hækka einnig hámarkshlutfall sértæks húsnæðisstuðnings af húsnæðiskostnaði, en nú getur stuðningurinn numið 90 prósentum af húsnæðiskostnaði hvers heimilis í stað 75 prósenta.

Hámarksfjárhæðir húsnæðisstuðningsins hafa einnig hækkað með lagabreytingunni, en þær eru nú fimmtungi hærri en þær voru fyrir heimili með 1-4 heimilismeðlimum. Hámarksgreiðslur fyrir heimili með 5 heimilismeðlimum hækka hins vegar um 30 prósent og heimili með 6 eða fleiri heimilismeðlimum hafa hækkað um 40 prósent.

Súluritið hér að ofan sýnir breytinguna í hámarksstuðningi til grindvískra heimila eftir stærð heimilanna með nýju lagabreytingunum. Þar sést að hámarksupphæð stuðnings til heimila með 6 eða fleiri heimilismeðlimi nemi nú um 350 þúsund krónum, miðað við um 250 þúsund krónur fyrir lagabreytingu.

Hægt er að skoða sértækan húsnæðisstuðning til Grindavíkur á hvert heimili samkvæmt núgildandi lögum með uppfærðri reiknivél sem finna má á island.is.