Akraneskaupstaður hefur staðfest endurskoðun á húsnæðisáætlun sveitarfélagsins fyrir árið 2025. Samkvæmt miðspá um mannfjöldaþróun áætlar sveitarfélagið að mannfjöldi aukist um 21,9 prósent næstu 10 árin. Til samanburðar hefur íbúum í sveitarfélaginu fjölgað um 1.065 manns frá árinu 2021, sem er um 12,2 prósent aukning.

Samkvæmt húsnæðisáætluninni er áætlað að þörf verði fyrir um 63 íbúðir á ári, 317 íbúðir næstu 5 ár og 759 íbúðir næstu 10 ár. Til samanburðar þá hefur fullbúnum íbúðum fjölgað að meðaltali um 99 íbúðir á ári síðastliðin 5 ár.

Samkvæmt talningu HMS voru 231 íbúðir í byggingu í september 2024. Á myndinni hér að neðan má sjá að flestar þessara íbúða eru á seinni stigum framkvæmda, þ.e.a.s. á fokheldu stigi (stigi 3) eða lengra komnar.

Fjöldi íbúða í byggingu er í takt við áætlaða íbúðaþörf samkvæmt mannfjöldaspá húsnæðisáætlunar.

Markmið sveitarfélagsins er að fjölga lóðum fyrir allar tegundir íbúða, þar á meðal einbýli, par/raðhús og fjölbýlishús. Markmiðið er að mæta þörf í öllum tegundum íbúða á næstu árum og er stefnan að viðhalda núverandi hlutfalli milli sérbýla og fjölbýla til lengri tíma.

Akraneskaupstaður hefur nú skipulagt lóðir fyrir 1.767 íbúðir. Á næstu 5 árum stefnir sveitarfélagið að því að úthluta lóðum fyrir allt að 1.097 íbúðir svo lóðaframboð mæti vel áætlaðri íbúðaþörf.