Áætlun eignamarka hefur ekki áhrif á tilvist eða efni eignarréttinda landeiganda. Markmið áætlunar eignamarka er margþætt en eitt helsta markmið verkefnisins er sá ávinningur sem hlýst af skýrari upplýsingum um landamerki og eignarhald lands, fyrir jafnt landeiganda og samfélagið í heild sinni.

Eftir að niðurstaða áætlaðra eignamarka liggur fyrir, þarf landeigandi ekki að aðhafast frekar. Hann getur látið áætlun eignamarka standa sem slíka og þjónar hún þá sem viðmið sem að getur komið að ýmsum notum, til dæmis við kaup og sölu, samskipti við opinbera aðila og fleira.

Landeigandi getur ráðið merkjalýsanda til að vinna merkjalýsingu fyrir sig og þannig klára fullnaðarskráningu á merkjum jarðar sinnar. Allir landeigendur tiltekinnar jarðar og eigendur aðliggjandi eigna, þurfa að samþykkja landamerki og aðrar upplýsingar í merkjalýsingu. Vinna HMS við áætlun eignamarka getur í slíkum tilvikum sparað merkjalýsanda vinnu og þannig orðið til sparnaðar fyrir landeiganda.

Landeigandi getur á hvaða tímapunkti sem er ráðið merkjalýsanda til að gera fyrir sig merkjalýsingu, óháð því hvort búið er að áætla eignamörk eða ekki.