Vind- og slagregn­sáraun á mann­virki

Verkefnið snýst um notkun á tölulegum straumfræðihermunum (e. Computational Fluid Dynamics, CFD) við greiningar á vind- og veðuráraun á mannvirki. Verkefnið tengist uppfærslu á Evrópustaðli (EN1991-1-4:2005). Í drögum að nýjum staðli er aukið svigrúm til hagnýtingar CFD hermana á vindálagi . Einnig er nýr viðauki um ákvörðun grunngildis vindhraða út frá mælingum og tölfræðilega greiningu á vindálagi. Það eru því töluverðar breytingar á ákvörðun vindálags í nýjum staðli.

Með nákvæmari ákvörðun vindálags er ennfremur hægt að meta slagregnsáraun með nákvæmari hætti. ISO staðall 15927-3 skilgreinir aðferðir til að reikna slagregnsstuðul (e. driving rain index). Í nágrannalöndum er aðferðin notuð til að kortleggja og flokka svæði eftir slagregnsáraun, sem nýtist hönnuðum. Aðferðafræðinni verður beitt á hérlendar aðstæður.

Vindálag og slagregn er lykilþáttur í hönnun mannvirkja á Íslandi og munu niðurstöðurnar gagnast hönnuðum og tryggja hagkvæmni og endingu nýrra mannvirkja.