Vísitala íbúðaverðs mældist 110,5 stig í febrúar og hækkaði um 0,09 prósent á milli mánaða eftir að hafa hækkað um 1,5 prósent í janúar síðastliðnum. Á síðustu 12 mánuðum hefur íbúðaverð hækkað um 8,4 prósent, á sama tíma og verðbólga mældist 4,2 prósent.

Mánaðarbreyting íbúðaverðs í febrúar er mun minni en hún hefur verið síðastliðna 12 mánuði, en á því tímabili hefur mánaðarbreyting íbúðaverðs verið að meðaltali 0,7 prósent. Á mynd hér að neðan má sjá mánaðarbreytingu vísitölu íbúðaverðs á síðustu mánuðum.

Taflan hér að neðan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Verð á fjöl­býl­um hækka á sama tíma og verð á sér­býl­um lækka

Verð á fjölbýlishúsum á höfuðborgarsvæðinu hækkaði á milli mánaða í febrúar eftir að hafa haldist stöðugt síðustu mánuði. Mánaðarhækkun íbúðaverðs hjá fjölbýlum á höfuðborgarsvæðinu nam 1,6 prósent á milli mánaða í febrúar.

Á sama tíma lækkaði verð á sérbýlum á höfuðborgarsvæðinu í febrúar um 2,3 prósent á milli mánaða. Vísitala sérbýlis á höfuðborgarsvæðinu hefur undanfarið tekið töluverðum sveiflum á milli mánaða. Til að mynda lækkaði hún um 2,2 prósent á milli mánaða í desember síðastliðnum, en hækkaði svo um 3,7 prósent á milli mánaða í janúar.

Undirvísitölur fjölbýlis og sérbýlis á höfuðborgarsvæðinu hafa hins vegar ekki hækkað jafn mikið á síðustu tólf mánuðum og vísitala íbúðaverðs. Á síðustu 12 mánuðum hefur sérbýli á höfuðborgarsvæðinu hækkað um 8 prósent og fjölbýli um 7,1 prósent.

Mæla­­­­borð fyr­­­­­ir vísi­­­­­töl­­­­­ur HMS

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð.

Einnig sýnir mælaborðið undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri undirvísitölu íbúðaverðs á höfuðborgarsvæðinu og tekur gildið 100 í janúar 2024. Mælaborðið má finna á https://hms.is/gogn-og-maelabord/visitolur