Fjármálaeftirlitið lauk nýverið athugun á útlánum Íbúðalánasjóðs til lögaðila. Sjóðurinn uppfyllti ekki að fullu skilyrði við lánveitingar til ákveðinna lögaðila á árinu 2017 samkvæmt athugun Fjármálaeftirlitsins. Íbúðalánasjóður hefur þegar gert úrbætur á verklagi sínu og endurskoðað meðferð lánsumsókna. Starfsmaður innra eftirlits mun fylgjast sérstaklega með því að farið sé að viðurkenndu verklagi sjóðsins. Stjórnendur sjóðsins taka niðurstöðum athugunarinnar mjög alvarlega, en meðal annars eru gerðar athugasemdir við að sumir lánsumsækjendur hafi ekki skilað inn öllum þeim fylgigögnum sem fylgja eiga lánsumsóknum. Íbúðalánasjóður hefur tilkynnt Fjármálaeftirlitinu að sjóðurinn hafi þegar gert úrbætur í skipulagi og eftirfylgni við afgreiðslu slíkra mála. Ljóst sé að vinnsla lánsumsókna hafi ekki að öllu leyti fylgt þeim reglum sem um lánveitingar sjóðsins gilda og við það verði ekki unað. Ráðist verði í að tryggja með sem bestum hætti að útlán hlíti þeim lögum og reglum sem um útlánin gilda, vandaða málsmeðferð og að öll gögn séu til staðar við lánsákvörðun.