Forstjóri HMS: „Erum að stíga stórt skref í áttina að auka gæði upplýsinga um stöðuna á húsnæðismarkaði“

Húsnæðis- og mannvirkjastofnun kynnti nú á haustmánuðum breytt fyrirkomulag húsnæðisáætlana þar sem þær verða alfarið á samræmdu stafrænu formi frá og með árinu 2022. Þessi breyting er í samræmi við niðurstöðu samstarfsþings HMS og sveitarfélaganna sem haldið var í janúar sl.

Sveitarfélögin vinna þessa dagana í gerð stafrænna húsnæðisáætlana og er sú vinna vel á veg komin í allflestum sveitarfélögum. HMS hefur fram til þessa fundað með 39 sveitarfélögum og leiðbeint með vinnslu í nýju áætlanakerfi stafrænna húsnæðisáætlana en borist hafa upplýsingar um tengiliði sem munu vinna í áætlanakerfinu fyrir 62 sveitarfélög. Niðurstöður húsnæðisáætlana verða kynntar á húsnæðisþingi HMS sem haldið verður í lok janúar nk.

Stjórnvöld taka fast utan um húsnæðismálin

Stafrænar húsnæðisáætlanir sveitarfélaga verða mikilvægt stjórntæki stjórnvalda í stefnumótun og opinberum stuðningi.

Í stjórnarsáttmála nýrrar ríkisstjórnar er lögð rík áhersla á húsnæðismál þar sem m.a. er komið inn á að tryggt verði að fyrir liggi greinargóðar rauntímaupplýsingar og betri yfirsýn um húsnæðismarkað, framboð íbúða, framboð á lóðum og stöðu í skipulags- og byggingamálum á öllu landinu. Ásamt þessu kemur fram að stjórnvöld muni innleiða stafræna stjórnsýslu í auknum mæli og styðja við stafræna þróun sveitarstjórnarstigsins.