20. maí 2025
21. apríl 2023
Sótt um stofnframlög til byggingar eða kaupa á 298 almennum leiguíbúðum.
Þann 21. mars sl. opnaði Húsnæðis- og mannvirkjastofnun fyrir umsóknir um stofnframlög í fyrstu úthlutun ársins 2023, umsóknar frestur var fjórar vikur og til úthlutunar á árinu eru tæpir 4 milljarðar.
- Alls bárust 25 umsóknir frá 12 umsækjendum til byggingar eða kaupa á samtals 298 hagkvæmum leiguíbúðum.
- Sótt er um stofnframlög í 17 sveitarfélögum í öllum landshlutum og eru 70% íbúðanna á Höfuðborgarsvæðinu og 30% á landsbyggðinni.
- Heildarfjárfesting verkefnanna er um 15,4 milljarðar og er umsótt fjárhæð vegna stofnframlaga ríkisins um 3,2 milljarðar.
- Stofnframlag sveitarfélaganna 17 sem sótt er um stofnframlög í er 1,8 milljarðar.
- Hlutdeild nýbyggingarverkefna er 60% og kaupa 40% og er stór hluti af þeim keyptu íbúðum úr nýbyggingum.
Stofnframlög hafa verið veitt til uppbyggingar á yfir 3.000 íbúðum
Frá árinu 2016 þegar lög um stofnframlög tóku gildi hafa stjórnvöld úthlutað framlögum fyrir samtals 30 milljarða til uppbyggingar á rúmlega 3.000 almennum leiguíbúðum víðsvegar um landið. Á þessu ári hafa 180 almennar leiguíbúðir verið teknar í notkun sem erum um fjórðungur allra nýrra íbúða á árinu og samtals hafa rúmlega 2.000 almennar íbúðir verið teknar í notkun frá upphafi.
Hvað eru stofnframlög?
Stofnframlög eru stuðningur í formi eiginfjár sem veitt eru annars vegar fyrir hönd ríkis í gegnum HMS og hins vegar frá viðkomandi sveitarfélagi þar sem íbúðirnar koma til með að vera staðsettar í. Stofnframlög eru veitt til bæði kaupa og byggingar á íbúðarhúsnæði.
Markmiðið með stofnframlögunum er að fjölga hagkvæmum leiguíbúðum og bæta húsnæðisöryggi tekju- og eignalágra með aðgengi að viðunandi húsnæði á viðráðanlegu verði. Húsnæðiskostnaður á að vera í samræmi við greiðslugetu og að jafnaði ekki umfram fjórðung tekna.
Stofnframlag ríkisins er 18% og sveitarfélags er 12%. Ríki er heimilt er að veita allt að 4% viðbótarframlag vegna íbúðarhúsnæðis á vegum sveitarfélaga, íbúðarhúsnæðis ætlað námsmönnum eða öryrkjum. Einnig er heimilt að veita sérstakt byggðaframlag vegna byggingar almennra íbúða á svæðum þar sem skortur er á leiguhúsnæði og bygging í búða hefur verið í lágmarki.
