1. apríl síðastliðinn greiddi HMS um 1.039 milljónir króna í húsnæðisstuðning til leigjenda vegna leigu í mars. Þessar greiðslur styðja við þúsundir heimila um allt land og miða að því að draga úr húsnæðiskostnaði efnaminni leigjenda og auka húsnæðisöryggi þeirra. Greiðslurnar taka til þriggja mismunandi flokka húsnæðisstuðnings; almennra húsnæðisbóta, sértæks stuðnings fyrir Grindvíkinga, og veitingu sérstaks stuðnings fyrir íbúa Kópavogs og Skagafjarðar.

Al­menn­ar hús­næð­is­bæt­ur

Húsnæðisbætur, sem er stærsti hluti þessa stuðnings, er ætlað að lækka húsnæðiskostnað tekju- og eignalægri leigjenda til að styðja þá við að standa straum af leigugreiðslum. HMS greiddi tæplega 921 milljón króna til 17.427 umsækjanda í almennar húsnæðisbætur vegna leigu í marsmánuði.

Sér­tæk­ur hús­næð­is­stuðn­ing­ur vegna nátt­úru­ham­fara í Grinda­vík­ur­bæ

Frá því í desember 2023 hefur HMS borið ábyrgð á greiðslu sértæks húsnæðisstuðnings til Grindvíkinga. Stuðningnum er ætlað að styðja við Grindvíkinga vegna náttúruhamfara sem hafa leitt til þess að íbúar Grindavíkur hafa þurft að yfirgefa heimili sín. HMS hefur greitt stuðninginn til þeirra íbúa sem hafa neyðst til að leigja íbúðarhúsnæði utan Grindavíkur og hefur verið greiddur mánaðarlega. Rúmar 93 milljónir voru greiddar vegna leigu í mars til um 454 heimila. Líkt og lesa má úr þessari frétt frá 20. mars er greiðsla þessa mánaðar jafnframt sú síðasta vegna sértæks húsnæðisstuðnings vegna náttúruhamfara í Grindavík.

Sér­stak­ur hús­næð­is­stuðn­ing­ur fyr­ir Kópa­vog og Skaga­fjörð

HMS greiðir einnig sérstakan húsnæðisstuðning fyrir sveitarfélögin Skagafjörð og Kópavog sem hluti af tilraunaverkefni stjórnvalda. Sérstakur húsnæðisstuðningur er á forræði sveitarfélaganna og felur í sér aukinn stuðning við þá sem sökum fjárhagslegra- eða félagslegra aðstæðna eiga erfitt með að standa straum af húsnæðiskostnaði. Greiddar voru tæpar 25 milljónir króna til 978 umsækjenda í Kópavogi og 89 umsækjenda í Skagafirði.