13. maí 2025
23. nóvember 2023
Mýrdalshreppur undirritar samkomulag um aukna uppbyggingu íbúðarhúsnæðis
Útgáfuáætlun
Hér má sjá útgáfuáætlun HMS
- Mýrdalshreppur er annað sveitarfélagið sem skilgreinir framlag sitt til aukins framboðs íbúðarhúsnæðis innan rammasamnings milli ríkis og sveitarfélaga.
- Sköpuð verða skilyrði í Vík til þess að byggðar verði um 20 íbúðir á árin næstu fimm árin sem er nærri 7% árlegur vöxtur mv. núverandi stærð sveitarfélagsins.
- Samkomulagið gerir ráð fyrir auknu framboði hagkvæmra íbúða með viðráðanlegan húsnæðiskostnað og að 45 slíkar íbúðir verða byggðar á næstu fimm árum. Það jafngildir 15% allra íbúða í Mýrdalshreppi sem eru nú 293 talsins, skv. mannvirkjaskrá HMS.
Mýrdalshreppur varð á dögunum annað sveitarfélagið til þess að undirrita samkomulag um aukið framboð íbúðarhúsnæðis á næstu fimm árum.
Mýrdalshreppur er jafnframt fyrsta sveitarfélagið til þess að staðfesta árlega endurskoðun á húsnæðisáætlun sveitarfélagsins fyrir árið 2024.
Sigurður Ingi Jóhannsson innviðaráðherra, Einar Freyr Elínarson sveitarstjóri Mýrdalshrepps og Hermann Jónasson forstjóri Húsnæðis- og mannvirkjastofnunar hafa undirritað samkomulag um að á Vík verði byggðar um 20 íbúðir á ári á næstu fimm árin og að fjármögnuð verði á tímabilinu uppbygging á allt að 45 íbúðum með viðráðanlegan húsnæðiskostnað.
Sigurður Ingi Jóhannsson: „Ég fagna því að Mýrdalshreppur sé fyrst sveitarfélaga á landsbyggðinni til að stíga þetta skref og setja sér skýra stefnu um aukið framboð íbúðarhúsnæðis. Mikil fjölgun íbúa hefur átt sér stað í Vík og mikilvægt að mörkuð sé skýr stefna til að mæta fyrirsjáanlegri íbúðaþörf. Við stefnum að gríðarlegri uppbyggingu á næstu árum um allt land og mikilvægt að ríki og sveitarfélög hafi sameiginlega sýn til að mæta þeirri þörf sem blasir við.“
Áformin eru í samræmi við nýstaðfesta húsnæðisáætlun Mýrdalshrepps fyrir árið 2024 og ætlar sveitarfélagið að leitast við að tryggja nægjanlegt framboð byggingarhæfra lóða í samræmi við samkomulagið þannig að byggingarhæfar lóðir ár hvert rúmi 20-30 íbúðir.
Einar Freyr Elínarson: „Samkomulagið markar tímamót fyrir Mýrdalshrepp og styður við markmið sveitarfélagsins um heilbrigðan húsnæðismarkað fyrir ört fjölgandi hóp íbúa. Mýrdalshreppur verður við undirritun samkomulagsins annað sveitarfélagið á landinu til þess að marka skýra stefnu um aukið framboð íbúðarhúsnæðis á grundvelli rammasamnings ríkis og sveitarfélaga. Aukið framboð íbúða er lykilatriði í því að styðja við sjálfbæra byggðaþróun og samvinna ríkis og sveitarfélagsins er mikilvægur liður í áframhaldandi uppbyggingaráformum Mýrdalshrepps.“
Fylgiskjöl:
Útgáfuáætlun
Hér má sjá útgáfuáætlun HMS
