Greina má merki um kólnun á vinnumarkaði byggingariðnaðarins þar sem lausum störfum hefur fækkað á sama tíma og atvinnulausum hefur fjölgað. Þá eru einnig vísbendingar um samdrátt á fyrstu stigum framkvæmda, en vinna er hafin við hálfsárslega talningu á íbúðum í byggingu sem mun gefa skýrari upplýsingar um stöðu íbúðauppbyggingar þessa stundina.

Þetta er meðal þess sem fjallað er um í mánaðarskýrslu HMS fyrir ágústmánuð sem kom út í gær. Skýrsluna má nálgast með því að smella á hnappinn hér að neðan.

Óupp­fyllt eft­ir­spurn eft­ir vinnu­afli í bygg­ingar­iðn­aði hef­ur dreg­ist sam­an

Lausum störfum í byggingarstarfsemi og mannvirkjagerð hefur fækkað mikið og hafa þau verið um það bil helmingi færri á þessu ári heldur en á sama tíma í fyrra. Hlutfall lausra starfa í greininni hefur sömuleiðis lækkað mikið og mældist 3,4% á öðrum ársfjórðungi samanborið við 6,4% á öðrum ársfjórðungi í fyrra.

Á sama tíma og lausum störfum hefur fækkað hefur starfandi í byggingariðnaði fækkað lítillega á milli ára og atvinnulausum í greininni fjölgað talsvert. Óuppfyllt eftirspurn eftir vinnuafli í byggingariðnaði hefur því minnkað að undanförnu.

Bygg­ing­ar­leyf­um fækk­ar fyr­ir upp­bygg­ingu nýrra íbúða

Tæplega 5.800 íbúðir eru nú í byggingu á landinu öllu og framkvæmdum hefur verið lokið við rúmlega 1.500 nýjar íbúðir það sem af er ári samkvæmt mælaborði íbúða í byggingu. Þó má greina vísbendingar um samdrátt á allra fyrstu stigum framkvæmda þar sem útgefnum byggingarleyfum fyrir nýjar íbúðir hefur fækkað að undanförnu.

Á mynd hér að neðan má sjá fjölda útgefinna byggingarleyfa fyrir uppbyggingu nýrra íbúða eftir árshelmingum frá 2020. Líkt og myndin sýnir voru 56 byggingarleyfi gefin út fyrir uppbyggingu nýrra íbúðarhúsa á fyrri helmingi þessa árs, en þau voru 66 á síðasta árshelmingi. Dregið hefur úr veitingu byggingarleyfa á síðustu misserum, en þau voru töluvert fleiri á tímabilinu 2021-2023.  Samdráttinn má mæla hjá bæði einbýlishúsum og fjölbýlishúsum.

Mögulegur samdráttur í íbúðauppbyggingu á sér stað á sama tíma og fjárhagsstaða byggingarfyrirtækja hefur versnað, en Samtök iðnaðarins hafa greint frá því að vanskil í byggingariðnaði hafi stóraukist frá síðasta ári.

Á þessum tölum hvílir þó sá fyrirvari að eitt byggingarleyfi getur verið veitt fyrir uppbyggingu margra íbúða. Samdráttur í útgáfu byggingarleyfa fyrir fjölbýlishús bendir aftur á móti til þess að færri nýjar íbúðir verði fullbúnar í þeim byggingarverkefnum sem veitt var byggingarleyfi fyrir á nýliðnum árshelmingi.

Sept­em­bertaln­ing á íbúð­um í bygg­ingu er yf­ir­stand­andi

Betri upplýsingar um framvindu íbúðauppbyggingar fást með talningu á íbúðum í byggingu, en HMS framkvæmir slíka talningu tvisvar sinnum á ári. Niðurstöður talningarinnar eru kynntar í mars og september ár hvert.

Vinna er hafin við septembertalningu HMS og upplýsingar í mælaborði íbúða í byggingu verða uppfærðar þegar þær berast frá talningunni. Kynning á niðurstöðum septembertalningar er fyrirhuguð þann 22. september næstkomandi.