Leigumarkaðsdeild  Íbúðalánasjóðs hefur birt skýrslu með niðurstöðum nýrrar rannsóknar meðal almennings þar sem viðhorfum til leigumarkaðarins eru gerð skil. Leigumarkaðurinn hefur stækkað talsvert síðastliðinn áratug og telur nú hátt í 50.000 manns. Horfur eru á að fjöldi fólks á leigumarkaði verði áfram mikill næstu misseri. Fram kemur í skýrslunni að vísbendingar eru um að framboð leiguhúsnæðis hafi ekki haldist í hendur við þann fjölda sem er á leigumarkaði og sömuleiðis að hlutfall ráðstöfunartekna sem lágtekjuhópar verja til leigu hér á landi hafi verið hærra en í nágrannalöndum á undanförnum árum. Fram kemur að fjárhagsstaða leigjenda sé verri en fjárhagsstaða annarra og að flestir telja óhagstætt að vera á leigumarkaði. Þrátt fyrir þessa skoðun telja flestir leigjendur líkur á að vera áfram á leigumarkaði næstu mánuði. Húsnæðisöryggi landsmanna eykst milli ára, en er áfram minna á meðal leigjenda en húsnæðiseigenda.Skýrsluna má nálgast í heild sinni hér.