Húsnæðis,- mannvirkja- og skipulagsstofnun (HMS) hélt í dag kynningarfund um nýjar leiðbeiningar um ljósvist í húsakynnum stofnunarinnar. Fundurinn var vel sóttur og sóttu hann fulltrúar sveitarfélaga, fagfólk úr mannvirkjageiranum og aðrir hagaðilar sem koma að skipulagi, hönnun og mannvirkjagerð. 

Á fundinum voru kynntar nýjar leiðbeiningar um ljósvist annars vegar í skipulagsgerð og hins vegar í tengslum við ákvæði byggingarreglugerðar. Farið var yfir hvað nýjar kröfur fela í sér á öllum stigum ferlisins, frá stefnumótun og skipulagi til hönnunar og framkvæmdar, og hvernig þær stuðla að auknum gæðum byggðar og bættri búsetu. 

Ólafur Árnason, framkvæmdastjóri skipulags- og umhverfismatssviðs, fjallaði um aðdraganda leiðbeininganna og mikilvægi ljósvistar í víðara samhengi gæða í skipulagi. Elín Þórólfsdóttir, teymisstjóri starfsumhverfis mannvirkjagerðar hjá HMS, kynnti leiðbeiningar um ljósvist í tengslum við byggingarreglugerð. Þá kynnti Borghildur Sölvey Sturludóttir, arkitekt hjá HMS, leiðbeiningar um ljósvist í skipulagsgerð. 

Að kynningum loknum fóru fram pallborðsumræður með þátttöku Auðar Dagnýjar Kristinsdóttur, skipulagsfulltrúa Kópavogsbæjar, Jóhönnu Klöru Stefánsdóttur, sviðsstjóra mannvirkjasviðs Samtaka iðnaðarins, og Magneu Guðmundsdóttur, arkitekts hjá Teiknistofunni Stiku. 

Í umræðum komu fram jákvæð viðbrögð við leiðbeiningunum og var áréttað að þær væru mikilvægt skref í átt að skýrari kröfum og betra samspili skipulags og mannvirkjagerðar. Lögð var áhersla á nauðsyn þess að hönnun komi fyrr inn í ferli deiliskipulagsgerðar og að mikilvægt sé að eiga áframhaldandi samtal við sveitarfélög um þróun og endurskoðun skipulags- og leyfisferla í ljósi nýrra krafna.

Hér má nálgast ljósvistar leiðbeiningar fyrir skipulagsgerð.  

Hér má nálgast ljósvistarleiðbeiningar við byggingarreglugerð.  

Upptöku af fundinum má finna hér