Hlutverk Húsnæðis- og mannvirkjastofnunar er að vernda líf og heilsu manna, eignir og umhverfi með því að tryggja faglegan undirbúning mannvirkjagerðar og virkt eftirlit með gæðum, öryggi og heilnæmi. Að stuðla að stöðugleika á húsnæðismarkaði og tryggja almenningi aðgengi...

Húsnæðis- og mannvirkjastofnun

Skráðu þig á póstlista HMS og fáðu allar nýjustu fréttir sendar í pósthólfið þitt.

Póstlisti HMS

Fræðsla og forvarnir

Gögn og mælaborð

Brunavarnir

Byggingarreglugerð

Byggingarvörur

Fagaðilar í mannvirkjagerð

Fasteignaskrá

Húsnæðisáætlanir

Húsnæðisbætur og leigumál

Landeignaskrá

Lán til einstaklinga

Lán til lögaðila

Lífsferilsgreining (LCA)

Mannvirkjarannsóknasjóður - Askur

Mannvirkjaskrá

Markaðseftirlit

Rafmagnsöryggi

Stofnframlög

Þjónustuflokkar

Húsnæðisbætur

Lánavefur

Öryggi mannvirkja

Sveitarfélagsgátt

Um HMS

Fréttir

Gjaldskrá HMS

Lög og reglugerðir

Umsóknir og eyðublöð

Útgefið efni

Vaxtatafla

Bæði HMS og Hagstofan gefa út mánaðarlegar vísitölur tengdar húsnæðismarkaðnum

Hagstofan mælir kostnað neytenda vegna húsnæðis en HMS mælir meðalverð nýrra kaup- og leigusamninga

Grundvallarmunur í aðferðafræði og undirliggjandi gögnum leiðir til þess að vísitölurnar breytast ekki með sama hætti í hverjum mánuði

Bæði HMS og Hagstofa Íslands gefa út mánaðarlegar vísitölur tengdar húsnæðismarkaðnum. HMS gefur út íbúðavísitölu, sem mælir kaupverð fasteigna, og vísitölu leiguverðs á höfuðborgarsvæðinu. Hagstofan mælir einnig húsnæðiskostnað samhliða almennum verðlagsmælingum og gefur út undirvísitölur sem endurspegla þróun húsnæðisliðarins í vísitölu neysluverðs.

Mælingar HMS og Hagstofunnar eru að mörgu leyti áþekkar, þar sem þær mæla allar húsnæðiskostnað á einhvern hátt. Hins vegar er grundvallarmunur í aðferðafræði og undirliggjandi gögnum vísitalna HMS og Hagstofunnar sem leiðir til þess að vísitölurnar breytast ekki með sama hætti í hverjum mánuði.

Hagstofan mælir kostnað neytenda vegna húsnæðis

Húsnæðisliður vísitölu neysluverðs gæti haft mismunandi þýðingu eftir samhengi, en einn af tólf undirliðum vísitölu neysluverðs ber heitið „Húsnæði, hiti og rafmagn“. Sá undirliður skiptist svo aftur í fimm undirliði eins og sjá má í töflunni hér að neðan.

Undirliðurinn „Greidd húsaleiga“ mælir bein neysluútgjöld heimila vegna húsaleigu og á því að breytast í samræmi við meðalleigu allra heimila sem eru á leigumarkaði. Lesa má nánar um aðferðina á vef Hagstofunnar.

Undirliðurinn „Reiknuð húsaleiga“ er hins vegar flóknari, en hann mælir húsnæðiskostnað þeirra sem búa í eigin húsnæði. Þar sem útgjöld vegna eigin húsnæðis eru alla jafna aðallega fjárfestingarútgjöld og engin raunveruleg greiðsla á sér stað fyrir afnot af húsnæðinu eru neysluútgjöld vegna notkunar á eigin húsnæði metin með óbeinum hætti.

Ýmsar leiðir eru færar til að meta kostnað við búsetu í eigin húsnæði en fram til júnímánaðar 2024 notaði Hagstofan reikniaðferð sem tók mið af fasteignaverði og raunvöxtum. Frá og með júnímánuði 2024 tók Hagstofan upp aðferð reiknaðs húsaleiguígildis, sem felst í því að meta þá markaðsleigu sem einstök heimili myndu greiða ef þau væru á leigumarkaði. Lesa má nánar um aðferðina á vef Hagstofunnar.

Líkanið sem Hagstofan notar til að finna reiknaða húsaleigu byggir á aðferð sem kennd er við „næsta nágranna“ og miðar að því að finna leiguíbúðir sem eru sem líkastar þeirri eignaríbúð sem verið er að meta húsaleiguígildi fyrir, með tilliti til staðsetningar og eiginleika íbúða. Leiguverð sambærilegra leiguíbúða er svo notað til að meta líklegt leiguverð eignaríbúðarinnar ef hún væri á leigumarkaði.

Vísitölur HMS mæla meðalverð nýrra kaup- og leigusamninga

HMS gefur út tvær vísitölur, eina fyrir íbúðaverð og aðra fyrir leiguverð á höfuðborgarsvæðinu. Hér má nálgast vísitölurnar, en með þeim má sjá þróun íbúðaverðs frá árinu 1981 og þróun leiguverðs frá árinu 2011.

Vísitala íbúðaverðs mælir gæðaleiðrétt kaupverð íbúða og byggir á þinglýstum kaupsamningum þess mánaðar sem vísitölugildið endurspeglar. Vísitölunni var síðast breytt árið 2024, en nú inniheldur hún undirvísitölur sem sýna verðþróun sérbýlis og fjölbýlis á höfuðborgarsvæðinu og utan höfuðborgarsvæðisins. Vísitala íbúðaverðs er frábrugðin mælingum Hagstofunnar, þar sem Hagstofan lítur ekki lengur til kaupverðs íbúða í mælingum sínum á húsnæðiskostnaði.

Vísitala leiguverðs mælir vegið meðalfermetraverð leiguíbúða á höfuðborgarsvæðinu og byggir á leigusamningum sem voru skráðir í leiguskrá HMS í þeim mánuði sem vísitölugildið endurspeglar eða mánuðinum þar á undan. Vísitölunni var síðast breytt árið 2024.

Hér má nálgast skýrslu sem útskýrir útreikning á íbúðavísitölu og leiguvísitölu HMS með ítarlegum hætti. Skýrslan inniheldur einnig útskýringu á fyrri vísitölum HMS fyrir íbúða- og leiguverð.

Mælingar HMS og Hagstofunnar eru líkar að einhverju leyti, en ekki öllu

Á mynd hér að neðan má sjá vísitölu leiguverðs, sem HMS gefur út, ásamt undirvísitölum fyrir reiknaða húsaleigu og greidda húsaleigu sem Hagstofan gefur út. Líkt og myndin sýnir hefur þróunin verið sambærileg á reiknaðri húsaleigu og leiguvísitölu HMS, á meðan greidd húsaleiga hefur hækkað meira frá júnímánuði 2024.

Vísitölurnar hreyfast þó ekki með sama hætti, þar sem munur er á útreikningi þeirra og gögnunum sem liggja að baki vísitölunum. Hér að neðan eru helstu atriði sem leiða til þess að vísitölurnar breytast með ólíkum hætti á milli mánaða:

Leiguvísitala HMS er einungis fyrir höfuðborgarsvæðið. Mælingar Hagstofunnar fyrir reiknaða og greidda húsaleigu eru hins vegar fyrir allt landið.

Leiguvísitala HMS byggir einungis á nýlegum samningum sem gerðir hafa verið í mánuðinum sem vísitalan endurspeglar eða mánuðinum þar á undan. Mælingar Hagstofunnar byggja hins vegar á öllum samningum sem voru í gildi í mánuðinum sem vísitalan endurspeglar fyrir reiknuðu húsaleiguna eða mánuðinum á undan fyrir greiddu húsaleiguna.

Reiknuð húsaleiga Hagstofunnar er birt í rauntíma á meðan greidd húsaleiga og vísitölur HMS eru birtar með töf. Hagstofan birtir septembergildi undirvísitalna fyrir reiknaða og greidda húsaleigu í sama mánuði. Reiknaða húsaleigan byggir á leigusamningum sem voru í gildi í september en greidda húsaleigan byggir á leigusamningum sem voru í gildi í ágúst. HMS reiknar aftur á móti septembergildi vísitölu leiguverðs út frá samningum sem tóku gildi í ágúst og september en birtir gildið þó ekki fyrr en í október.

Greidd húsaleiga Hagstofunnar byggir einungis á leigusamningum þeirra sem þiggja húsnæðisbætur. Leiguvísitala HMS og reiknuð húsaleiga Hagstofunnar byggja hins vegar á öllum markaðsleigusamningum sem eru skráðir í leiguskrá HMS.

Reiknuð húsaleiga Hagstofunnar mælir áætlað leiguverð alls íbúðahúsnæðis sem er í eigin notkun eigenda þess. Leiguvísitala HMS og greidd húsaleiga Hagstofunnar áætla hins vegar leiguverð íbúða sem eru á leigumarkaði. Af þeim ástæðum miðar Hagstofan við stærðardreifingu alls séreignarhúsnæðis þegar hún ákvarðar meðalleiguverð í reiknaðri húsaleigu. Aftur á móti er miðað við stærðardreifingu leiguhúsnæðis í leiguvísitölu HMS og greiddri húsaleigu Hagstofunnar.

Í töflunni hér að neðan má sjá samanburð á vísitölunum þremur:

Vísitölur HMS eru ólíkar mælingum Hagstofu Íslands á húsnæðiskostnaði

Vísitala íbúðaverðs mældist 112,8 stig í september og hækkaði um 1,53 prósent á milli mánaða

Á síðustu tólf mánuðum hefur íbúðaverð hækkað um 4,06 prósent, en árshækkunin nam 2,21 prósent í ágúst

Íbúðaverð stóð í stað að raunvirði milli septembermánaða 2024 og 2025, samanborið við 1,5 prósenta lækkun í ágúst og 0,2 prósenta hækkun í júlí

Vísitala íbúðaverðs mældist 112,8 stig í september og hækkaði um 1,53 prósent á milli mánaða. Á síðustu tólf mánuðum hefur íbúðaverð hækkað um 4,06 prósent, á sama tíma og verðbólga mældist 4,1 prósent.

Undanfarna 12 mánuði hefur íbúðaverð á landsvísu staðið í stað að raunvirði. Einstaka undirvísitölur hafa þó hækkað umfram verðbólgu á tímabilinu en í þeim flokki eru bæði sérbýli á höfuðborgarsvæðinu og vísitala fjölbýlis á landsbyggðinni.

Á mynd hér að neðan má sjá mánaðarbreytingu vísitölu íbúðaverðs á síðustu mánuðum.

Líkt og sjá má á töflunni hér að neðan hækkuðu allar undirvísitölur vísitölu íbúðaverðs milli mánaða, þó mismikið eða frá 0,46 prósent upp í 2,88 prósent. Taflan sýnir vísitöluna, ásamt mánaðarhækkun hennar og 12 mánaða hækkun, auk fjögurra undirvísitalna fjölbýlis og sérbýlis á landsbyggðinni og á höfuðborgarsvæðinu.

Vísitala | Gildi | Breyting á milli mánaða | 12 mánaða breyting

Vísitala íbúðaverðs fyrir september 2025

Íbúðaverð hefur staðið í stað að raunvirði

Undanfarna 12 mánuði hefur íbúðaverð á landsvísu staðið í stað að raunvirði. Sérbýlisíbúðir á höfuðborgarsvæðinu hafa þó hækkað um 2,1 prósent að raunvirði síðastliðið ár en fjölbýlisíbúðir á sama svæði hafa lækkað um 1,3 prósent að raunvirði á sama tíma.

Öfug verðþróun hefur átt sér stað á landsbyggðinni en þar hafa fjölbýlisíbúðir hækkað um 1,3 prósent að raunvirði síðastliðið ár en íbúðir í sérbýli á landsbyggðinni hafa lækkað um 1,7 prósent að raunvirði á sama tíma.

Mælaborð fyrir vísitölur HMS um íbúða- og leiguverð er aðgengilegt á vef HMS. Þar er hægt að nálgast þróun vísitölu íbúðaverðs, ásamt vísitölu íbúðaverðs á höfuðborgarsvæðinu og landsbyggð.

Einnig sýnir mælaborðið undirvísitölur íbúðaverðs og eldri vísitölu íbúðaverðs á höfuðborgarsvæðinu fyrir tímabilið 1994-2024 sem var birt á vef Fasteignaskrár, auk sameiginlegrar vísitölu, sem er byggð á eldri vísitölum íbúðaverðs fyrir tímabilið 1981-2024 og nýrri undirvísitölu íbúðaverðs á höfuðborgarsvæðinu og tekur gildið 100 í janúar 2024.

Vert er að nefna að finna má fjölmörg önnur mælaborð inni á hms.is og það nýjasta er mælaborð um fjölda íbúða og sumarhúsa. 

Vísitala íbúðaverðs hækkaði um 1,53 prósent á milli mánaða í september 2025

Alls tóku 2.163 nýir leigusamningar gildi í leiguskrá í september

Meðalfermetraverð leiguhúsnæðis var hæst í póstnúmerum 107 og 101 Reykjavík síðustu 12 mánuði

Stærstu leiguíbúðirnar og hæsta meðalleiguverðið var í póstnúmerum 201 og 203 Kópavogi undanfarið ár

Alls tóku 2.163 nýir leigusamningar gildi í leiguskrá í september á sama tíma og 959 samningar féllu úr gildi samkvæmt mælaborði leiguskrár á vef HMS. Gildum leigusamningum fjölgaði þannig um 1.204 í mánuðinum. Undanfarna 12 mánuði hefur meðalleiguverð á fermetra verið hæst í Vesturbæ og miðbæ Reykjavíkur, þar sem meðalstærð leiguhúsnæðis hefur jafnframt verið með því minnsta sem þekkist á höfuðborgarsvæðinu. Heildarleiguverð hefur aftur á móti að meðaltali verið hæst í Kópavogi á tímabilinu, enda leiguíbúðirnar að meðaltali stærri þar en í öðrum póstnúmerum á höfuðborgarsvæðinu.

Nýir leigusamningar á þriðja ársfjórðungi fleiri en í fyrra

Á nýliðnum þriðja ársfjórðungi þessa árs tóku alls 7.694 leigusamningar gildi í leiguskrá á meðan 5.195 samningar féllu úr gildi. Nýskráðum leigusamningum fjölgaði þannig um 73% frá öðrum ársfjórðungi þessa árs, sem skýrist að mestu af árstíðarsveiflum í nýskráningu leigusamninga um námsmannaíbúðir sem ná hámarki í ágústmánuði.

Nýskráðum leigusamningum í leiguskrá fjölgaði aftur á móti um 12% frá þriðja ársfjórðungi 2024 þegar alls 6.882 samningar tóku gildi. Þá féllu 16% fleiri samningar úr gildi á þriðja ársfjórðungi þessa árs samanborið við sama tímabil í fyrra.

Dýrustu leigufermetrarnir í Vesturbæ og miðbæ Reykjavíkur undanfarna 12 mánuði

Sé litið til undanfarinna tólf mánaða í leiguskrá á höfuðborgarsvæðinu má sjá að dýrast hefur verið að leigja húsnæði í Vesturbæ (107) og miðbæ (101) Reykjavíkur, en leiguverð þar var að jafnaði í kringum 4.500 krónur á hvern fermetra á tímabilinu. Meðalstærð leiguhúsnæðis á svæðinu var í kringum 62 fermetrar og meðalleigufjárhæð á bilinu 236 til 251 þúsund krónur á mánuði.

Hæsta meðalleigufjárhæðin var aftur á móti greidd fyrir leiguhúsnæði í póstnúmeri 201 sem nær til Smára-, Linda- og Salahverfis í Kópavogi, þar sem leigufjárhæð var að jafnaði um 308 þúsund krónur á mánuði. Meðalleigufjárhæð var jafnframt yfir 300 þúsund krónum í efri byggðum Kópavogs (203) og í Garðabæ (210) á tímabilinu. Þá var leiguhúsnæði að meðaltali stærst í þessum þremur póstnúmerum á tímabilinu, eða á bilinu 86 til 98 fermetrar.

Á meðfylgjandi mynd má sjá meðalfermetraverð, meðalleigufjárhæð, meðalstærð leiguhúsnæðis og fjölda leigusamninga úr leiguskrá HMS eftir póstnúmerum á höfuðborgarsvæðinu þar sem tekið er tillit til leigusamninga síðastliðinna 12 mánaða.

Mesta virknin á leigumarkaði mælist í póstnúmeri 102, sem nær til Vatnsmýrinnar í Reykjavík, en á undanförnum 12 mánuðum hafa verið gerðir 1.880 leigusamningar um húsnæði á svæðinu. Athygli vekur að meðalstærð leiguhúsnæðis í Vatnsmýrinni er umtalsvert minni en í öðrum póstnúmerum á höfuðborgarsvæðinu, eða 45 fermetrar, og leigufjárhæðin þar af leiðandi einnig töluvert lægri, eða 168 þúsund krónur. Fermetraverðið er þó með því hæsta sem þekkist og hefur verið yfir 4 þúsund krónum að meðaltali síðastliðið ár.

Mikill fjöldi leigusamninga, lítil stærð leiguíbúða, lágt leiguverð og hátt fermetraverð í póstnúmeri 102 skýrist af því að innan Vatnsmýrinnar rúmast meðal annars stúdentagarðar Háskóla Íslands og háskólagarðar Háskólans í Reykjavík.

Til viðbótar við póstnúmer 102 voru yfir 1.500 leigusamningar gerðir um húsnæði í póstnúmerum 105 og 101 undanfarna 12 mánuði. Fjöldi leigusamninga í þessum þremur póstnúmerum var marktækt meiri en í öðrum póstnúmerum, en til samanburðar voru tæplega 800 samningar gerðir um leiguhúsnæði í póstnúmeri 200 í Kópavogi á tímabilinu. Fæstir samningar voru um íbúðarhúsnæði á Seltjarnarnesi, eða 120 samningar undanfarið ár.

Einstaklingar á leigumarkaði eru um 11 ár að safna fyrir útborgun á lítilli fjölbýlisíbúð á höfuðborgarsvæðinu

Barnlaus pör eru talsvert betur sett en einstæð foreldri eru hátt í tvo áratugi að safna fyrir útborgun

Skattfrjáls ráðstöfun séreignarsparnaðar getur stytt tímann sem það tekur að safna fyrir fyrstu íbúð umtalsvert

Leigjendur þurfa að safna lengur fyrir fyrstu útborgun á íbúð heldur en á árunum 2017-2021. Greining HMS bendir til þess að barnlaus pör séu fljótust að safna, en að það geti tekið 11 ár fyrir einstaklinga og 18 ár fyrir einstæða foreldra að safna fyrir útborgun á lítilli íbúð á höfuðborgarsvæðinu.

Einstæðir foreldrar hátt í tvo áratugi að safna fyrir útborgun

Á myndinni hér að neðan má sjá áætlaðan fjölda ára sem það tæki einstaklinga, barnlaus pör og einstæð foreldri með eitt barn að safna fyrir útborgun á lítilli fjölbýlisíbúð á höfuðborgarsvæðinu í ár samanborið við fyrri ár. Tíminn styttist þó ef einstaklingar nýta sér heimild til skattfrjálsrar ráðstöfunar séreignarsparnaðar til íbúðakaupa.

Miðað við forsendur greiningarinnar eru einstaklingar rúmlega 11 ár að safna fyrir útborgun með eigin sparnaði, en um sjö ár sé séreignarsparnaði einnig ráðstafað til íbúðakaupa. Barnlaus pör eru öllu sneggri að safna fyrir útborgun eða um 1,7 ár með eigin sparnaði en 1,4 ár með séreignarsparnaði.

Vænni staða barnlausra para skýrist af samspili hærri heimilistekna og þess aukna hagræðis sem sambúð hefur í för með sér fyrir heimilisreksturinn, sér í lagi hvað varðar neysluútgjöld og húsaleigu.

Staða einstæðra foreldra er aftur á móti talsvert erfiðari, en samkvæmt gefnum forsendum tæki það einstæð foreldri um 18 ár að safna fyrir útborgun á lítilli fjölbýlisíbúð á höfuðborgarsvæðinu. Nýting heimildar til skattfrjálsrar ráðstöfunar séreignarsparnaðar til íbúðakaupa myndi stytta tímann niður í 8,8 ár. Án húsnæðis- og barnabóta myndi einstæða foreldrið í dæminu þó safna skuldum.

Söfnunartíminn styttri en árið 2023 en lengri en á árunum 2017-2021

Líkt og sjá má á myndinni að ofan tekur það allar fjölskyldugerðir lengri tíma að safna fyrir útborgun í dag en það tók þær árin 2017, 2019 og 2021. Þetta skýrist að hluta til af því að hámarksveðsetningarhlutfall fyrstu kaupenda var lækkað úr 90% niður í 85% árið 2022. Fyrstu kaupendur þurfa því að safna hærra hlutfalli af kaupverði íbúða til þess að geta keypt sér íbúð í dag samanborið við fyrir 2022.

Það hefur þó ekki síður áhrif hvað íbúðaverð hefur hækkað mikið undanfarin ár. Laun hafa ekki náð að halda í við verðhækkanir á fasteignamarkaði auk þess sem áætluð útgjöld heimilanna í dæminu hafa hækkað meira en tekjur þeirra frá 2017.

Á milli áranna 2023 og 2025 hefur tíminn sem það tekur að safna fyrir útborgun þó styst, en á þeim tíma hafa tekjur hækkað meira en bæði íbúðaverð og neysluútgjöld samkvæmt þeim forsendum sem miðað er við.

Geta sparað á bilinu 44 til 467 þúsund krónur á mánuði

Greining HMS byggir á ýmsum forsendum, m.a. um íbúðaverð, ráðstöfunartekjur, neysluútgjöld, húsaleigu og húsnæðis- og barnabætur. Á meðfylgjandi mynd má sjá áætlaðar tekjur, útgjöld og mánaðarlegan sparnað einstaklinga, barnlausra para og einstæðra foreldra í ár.

Tekjur fyrir skatt miðast við neðri fjórðungsmörk dreifingar heildarlauna fullvinnandi fólks fyrir árið 2024, uppreiknað fram í ágúst 2025 samkvæmt vísitölu launa. Gert er ráð fyrir að einstaklingar safni viðbótarlífeyrissparnaði og leggi fyrir 4% af heildarlaunum sínum til viðbótar við venjulegt skylduiðgjald í lífeyrissjóð.

Útgjöld samanstanda af neysluútgjöldum og húsaleigu. Neysluútgjöld taka mið af framfærsluviðmiði umboðsmanns skuldara og húsaleiga tekur mið af markaðsleigu fyrir tveggja herbergja leiguíbúð á höfuðborgarsvæðinu samkvæmt leiguverðsjá HMS. Fyrir einstakling er miðað við 40-70 fermetra íbúð en fyrir einstætt foreldri og barnlaus hjón er miðað við 60-90 fermetra íbúð. Þá er gert ráð fyrir að einstaklingar fái greiddar húsnæðisbætur og að einstæð foreldri fái greiddar hvoru tveggja húsnæðis- og barnabætur.

Miðað við framangreindar forsendur má áætla að einstaklingar geti lagt um 70 þúsund krónur til hliðar á mánuði, barnlaus pör um 467 þúsund krónur og einstæð foreldri einungis 44 þúsund krónur.

Samkvæmt kaupverðsjá HMS var meðalfermetraverð á 60-90 fermetra fjölbýlisíbúðum á höfuðborgarsvæðinu um 851 þúsund krónur í september. Því má gera ráð fyrir að slík íbúð kosti í kringum 64 milljónir króna. Hámarksveðsetningarhlutfall fyrstu kaupenda er 85% samkvæmt reglum Seðlabanka Íslands sem þýðir að fyrstu kaupendur þurfa að safna 9,6 milljónum króna til að eiga fyrir útborgun á lítilli íbúð í fjölbýli á höfuðborgarsvæðinu.

Við túlkun á niðurstöðum framangreindrar greiningar er rétt að hafa nokkur atriði í huga. Í fyrsta lagi miðast neysluútgjöld við framfærsluviðmið umboðsmanns skuldara, sem eru skammtímaviðmið. Viðmiðin hafa verið gagnrýnd fyrir að vera of lág og endurspegla þannig ekki raunverulegan framfærslukostnað. Ekki var unnt að styðjast við neysluviðmið félags- og húsnæðismálaráðuneytisins þar sem þau eru í endurskoðun og hafa ekki verið uppfærð frá því í október 2019.

Í öðru lagi er ekki reiknað með tryggingariðgjöldum öðrum en bílatryggingum auk þess sem ekki er sérstaklega gert ráð fyrir útgjöldum vegna rafmagns og hita. Í þriðja lagi er gert ráð fyrir að barn einstæðs foreldris sé á grunnskólaaldri og því ekki gert ráð fyrir sérstökum útgjöldum tengdum dagvistun eða leikskólagjöldum. Í fjórða lagi er ekki tekið tillit til væntrar íbúðaverðsþróunar á söfnunartíma né ávöxtunar á sparnað. Í ljósi alls framangreinds skulu niðurstöður greiningarinnar túlkaðar sem varfærið mat á þeim tíma sem það tekur að safna fyrir útborgun.

Lengri tíma tekur að safna fyrir útborgun nú en áður

HMS hefur framkvæmt endurreikning á öllum virkum umsóknum um húsnæðisbætur. Endurreikningurinn byggir á nýjustu tekju- og eignaupplýsingum frá Skattinum og er liður í reglubundnu eftirliti með húsnæðisbótum sem fer fram ársfjórðungslega.

Við endurreikning húsnæðisbóta er gerð ný tekjuáætlun á grundvelli fyrirliggjandi gagna, þar á meðal upplýsinga úr staðgreiðsluskrá Skattsins og annarra forsenda sem hafa áhrif á bótarétt.  

Umsækjendur munu á næstu dögum fá send bréf um nýja tekjuáætlun ef breyting hefur orðið bótafjárhæð við endurreikninginn.

HMS hvetur umsækjendur til að kynna sér niðurstöður nýrrar tekjuáætlunar sem verða sendar með bréfi á island.is á næstu dögum.

Ef einhverjar spurningar eða athugasemdir vakna vegna nýrrar tekjuáætlunar, er hægt að hafa samband með tölvupósti á hms@hms.is eða í síma 440-6400. 

HMS framkvæmir nýja tekjuáætlun í október

HMS framkvæmir nýja tekjuáætlun í október

Póstlisti HMS

Útgáfuáætlun

Póstlisti HMS

Útgáfuáætlun

Fleiri fréttir

Vísitölur HMS eru ólíkar mælingum Hagstofu Íslands á húsnæðiskostnaði

Vísitala íbúðaverðs hækkaði um 1,53 prósent á milli mánaða í september 2025

Dýrustu leigufermetrarnir í Vesturbæ og miðbæ Reykjavíkur undanfarna 12 mánuði

Lengri tíma tekur að safna fyrir útborgun nú en áður

Fleiri fréttir

Vísitölur HMS eru ólíkar mælingum Hagstofu Íslands á húsnæðiskostnaði

Vísitala íbúðaverðs hækkaði um 1,53 prósent á milli mánaða í september 2025

Dýrustu leigufermetrarnir í Vesturbæ og miðbæ Reykjavíkur undanfarna 12 mánuði

Lengri tíma tekur að safna fyrir útborgun nú en áður