Vísitala íbúðaverðs á höfuðborgarsvæðinu hækkaði um 0,1% á milli mánaða samkvæmt nýbirtum tölum Þjóðskrár Íslands. Árshækkun vísitölunnar stóð í stað á milli mánaðanna nóvember og desember 2018 og nam 5,9%. Að meðaltali hækkaði vísitala íbúðaverðs um 6,2% á milli áranna 2017 og 2018. Meðaltal árshækkana vísitölu íbúðaverðs á árunum 2012 til 2017 var 10,2% og voru 12 mánaða hækkanir á síðasta ári undir þeim viðmiðum að tveimur fyrstu mánuðum ársins undanskildum. Frá aldamótum hefur árshækkun vísitölunnar mælst að meðaltali um 9,1%.

Þjóðskrá Íslands hefur einnig nýlega birt tölur um leiguverð á höfuðborgarsvæðinu og lækkaði leiguverð um 0,7% á milli tveggja síðustu mánaða ársins og mælist árshækkun nú 7,8%. Árshækkun leiguverðs á árinu 2018 dansaði í kringum meðaltal árshækkana áranna 2012-2017 og er nú eilítið undir meðaltalinu sem er 8,6%.