Þjóðskrá Íslands birti í gær vísitölu fasteignaverðs fyrir höfuðborgarsvæðið og hækkar hún um 0,8% milli mánaða. Síðastliðna 12 mánuði hefur vísitalan hækkað um 7,2%. Langstærstur hluti hækkunarinnar hefur orðið frá því í vor þegar fyrra samkomubanni var aflétt, þegar mikið skrið komst á fasteignamarkaðinn eins og hagdeild hefur fjallað um oft áður. Frá því í apríl hefur vísitalan hækkað um 6% og frá maí um 5% og því ljóst að töluverðar hækkanir hafa orðið á þessum tíma. Til samanburðar þá hækkaði vísitalan milli apríl og nóvember í fyrra um 2% og 12 mánaða hækkunin fyrir allt árið nam 1,9%.

Á sama tíma hefur vísitala neysluverðs hækkað um 3,5% og raunverð hefur því hækkað um 3,7%. Síðasta mæling árshækkunar launavísitölu í október 2020 sýndi 7,1% árshækkun, þannig að miðað við laun hefur verðlag íbúða nánast staðið í stað seinast liðið ár.