Fyrirkomulag fasteignamats  og álagningar fasteignagjalda á Íslandi er í samræmi við alþjóðlega viðurkenndar bestu aðferðir. Þetta er á meðal þess sem kemur fram í nýrri skýrslu sem PwC á Íslandi gerði fyrir HMS um fasteignamat og álagningu fasteignagjalda. Skýrsluna má nálgast með því að smella á hnappinn hér fyrir neðan.

Samkvæmt PwC eiga fasteignamat og fasteignagjöld á Íslandi, Danmörku,  Noregi, Svíþjóð og Hollandi ýmislegt sameiginlegt hvað varðar framkvæmd álagningar fasteignagjalda og útreikning skattstofnsins. Hins vegar séu fasteignagjöld hérlendis nokkuð hærri en í samanburðarlöndum.

Sveit­ar­fé­lög­um sett­ar skorð­ur við álagn­ingu fast­eigna­gjalda

Fasteignagjöld eru almennt lögð á og innheimt af sveitarfélögum í hverju landi sem hlutfall af fasteignamati eða lóðamati.  Í skýrslu PwC kemur fram að í nágrannaríkjum Íslands séu sveitarfélögin á fjárlögum, sem veitir þeim meiri sveigjanleika í álagningu fasteignaskatta en á Íslandi og getur þannig leitt til sanngjarnari og hagkvæmari nýtingar á skatttekjum.

Á Íslandi er hins vegar til staðar Jöfnunarsjóður sveitarfélaga sem jafnar út skatttekjur á milli sveitarfélaga. Samkvæmt PwC refsar jöfnunarsjóðurinn sveitarfélögum sem lækka álagningu fasteignagjalda og skapar þannig hvata til þungrar skattbyrðar á íbúðarhúsnæði.

PwC leggur til að sveitarfélögum verði veittar auknar heimildir og meiri sveigjanleika til að nýta fasteignagjöld og -skatta sem stjórntæki. Slíkt gæti til dæmis falið í sér heimildir til hærri álagningar á íbúðarhúsnæði sem ekki er nýtt til búsetu og heimildir til að setja upp hvata til nýtingar á lóðum eða til að flýta uppbyggingu.