Heildarvelta kaupsamninga um atvinnuhúsnæði nam 8,4 milljörðum króna í apríl, sem er 4,8 prósentum yfir langtímameðaltali síðustu þriggja ára og 30 prósentum yfir heildarveltu marsmánaðar. Þetta kemur fram í mánaðarlegum tölum HMS um veltu með atvinnuhúsnæði, sem nálgast má hér að neðan.

Mánaðartölur um veltu með atvinnuhúsnæði

Alls nam velta með atvinnuhúsnæði 32,2 milljörðum króna á fyrstu fjórum mánuðum þessa árs og er það nokkuð svipuð upphæð miðað við sama tímabil í fyrra en þá nam veltan einnig 32 milljörðum króna. Þó hefur kaupsamningum fækkað nokkuð á milli ára, en þeir voru 343 talsins á fyrstu fjórum mánuðum ársins, samanborið við 413 á fyrstu fjórum mánuðum 2023.

Hærri velta milli mánaða á öllu landinu

HMS hefur áður greint frá því að viðskipti með atvinnuhúsnæði hafi tekið við sér eftir að hafa dregist saman á miðju síðasta ári. Viðskipti með atvinnuhúsnæði í apríl var 30 prósentum yfir heildarveltu marsmánaðar en fjöldi kaupsamninga voru alls 79 í apríl og hafa þeir ekki verið færri í aprílmánuði í fjögur ár.

Á höfuðborgarsvæðinu var heildarvelta kaupsamninga 6,1 milljarðar króna í apríl sem er 22 prósentum hærri en í marsmánuði. Heildarveltan utan höfuðborgarsvæðisins jókst einnig milli mánaða, eða úr 1,5 milljörðum króna í 2,3 milljarða króna.

Þessi frétt var uppfærð 26. júní 2024.