14
okt.

Nýjar orkumerkingar hvítvara

Orkumerkimiði ESB hefur leiðbeint neytendum við val á orkunýtnum vörum í meira en 25 ár. Hann hefur stuðlað að þróun í átt til orkunýtnari vara og dregið þannig verulega úr orkunotkun og kostnaði við þær. Orkunýtniflokkarnir A+++ til G, hafa sífellt minni áhrif. Orkunýtniflokkar með mismunandi fjölda „+“ gefa ekki nægilegar skýrar upplýsingar. Þetta gerir neytendum erfitt fyrir að velja orkunýtnustu vörurnar.

Orkumerkimiðarnir hafa því verið endurbættir til samræmis við þarfir notenda. Nýju merkimiðarnir urðu sýnilegir í verslunum og vefverslunum í mars síðastliðnum.

 

Eftirfarandi vöruflokkar fengu nýja merkimiða:

  • Þvottavélar
  • Sambyggðar þvottavélar og þurrkarar
  • Uppþvottavélar
  • Sjónvörp og rafeindaskjáir
  • Kælitæki
  • Kælitæki notuð við beina sölu
  • Ljósgjafar (fengu nýjar orkumerkingar 1. september 2021)

Í ágúst og september síðastliðnum lét Húsnæðis- og mannvirkjastofnun BSI á Íslandi framkvæma skoðun á ástandi nýrra orkumerkinga hvítvara. Þær hvítvörur sem voru skoðaðar voru kælitæki, uppþvottavélar, þvottavélar og sambyggðar þvottavélar og þurrkarar. Í skoðuninni voru 886 tæki skoðuð. Í niðurstöðum skoðunarinnar kom fram að orkumerkingar í útstillingu á þessum tilteknu tegundum hafi almennt verið í góðu ástandi, þó þeim hafi að hluta til verið ábótavant. Fram kom að 80% tækjanna fengu engar athugasemdir, 83% tækjanna báru nýju orkumerkimiðana og 2% tækja báru enga orkumerkimiða.

 

Hver er helsti munurinn á gamla og nýja merkimiðanum?

  • Nýi merkimiðinn notar samræmda orkunýtniflokka, A til G, fyrir allar vörur. Orkunýtniflokkarnir A+++, A++ og A+ munu hverfa.
  • Merkimiðinn er tengdur við EPREL-gagnagrunninn með QR-kóða sem eykur gagnsæi og auðveldar markaðseftirlit.
  • Orkunotkun varanna er sýnd á meira áberandi og einsleitari hátt í miðhluta merkimiðans.
  • Í neðri hluta merkimiðans eru ýmis myndtákn sem skýra tiltekna eiginleika vörunnar. Nokkur þeirra eru eins og gamla merkimiðanum, sum hafa verið endurgerð og sum eru ný.

Dæmi um nýjan orkumerkimiða:

Dæmi um orkumiða

 

Hér er hægt að nálgast markaðskönnunina hér á vef Húsnæðis- og mannvirkjastofnunar

Getum við aðstoðað?

Getum við aðstoðað?

Hringdu og fáðu beint samband við þjónustufulltrúa í síma 440 6400 eða sendu okkur tölvupóst á netfangið hms@hms.is

Opnunartími þjónustuvers
Alla virka daga frá kl. 09:00 – 15:30

Húsnæðis- og mannvirkjastofnun
Borgartúni 21, 105 Rvk
Ártorgi 1, 550 Sauðárkróki
kt. 581219-1480