Fræðsla og forvarnir
Fræðsla og forvarnir
Fræðsla og forvarnir
Fræðsla og forvarnir
Kostir rafbíla
Kostir rafbíla
Rafbílar eru ökutæki með rafmagnsmótor og eru með rafhlöðu til orkugeymslu. Rafhlöður þeirra er hægt að endurhlaða með því að stinga í samband við innstungu. Flestir rafbílar nýta einnig hreyfiorku bílsins til að hlaða rafhlöðurnar.
Það eru tvær tegundir rafknúinna ökutækja:
Rafbílar (eða rafmagnsbílar) (e. battery electric vehicle, BEV)
- Rafbílar keyra eingöngu á rafmagni, þeir eru knúnir af rafmótorum sem fá raforku úr endurhlaðanlegum rafhlöðum í bílunum.
Tengiltvinnbílar (e. Plug-in Hybrid Electric Vehicles, PHEV)
- Tengiltvinnbílar keyra að hluta til á rafmagni með sama hætti og rafbílar, en einnig er hægt að keyra þá með jarðefnaeldsneyti, sem knýr brunahreyfil beint eða framleiðir rafmagn inn á rafhlöður.
ATH: Þessar leiðbeiningar taka ekki til tvinnbíla (e. Hybrid Electric Vehicles, HEV), þar sem þeir tengjast ekki dreifikerfi rafmagns og teljast því ekki rafknúin ökutæki. Öll orka sem búin er til í tvinnbíl er úr jarðefnaeldsneyti, þó svo að hluta hennar sé hægt að endurnýta með því að hlaða rafgeyma.
Helstu kostir rafbíla:
Skemmtilegir í akstri
Rafmótorar skapa tog um leið og straumi er hleypt á mótor og rafbílar eru því mjög snarpir og liprir í akstri. Þeir eru hljóðlátir í samanburði við bíla sem brenna jarðefnaeldsneyti, sem eykur ánægju í akstri
Lægra kolefnisfótspor
Viðamiklar rannsóknir sýna að rafbílar eru umhverfisvænni en bílar sem keyra á jarðefnaeldsneyti. Rannsókn Orku náttúrunnar sýnir að heildarlosun kolefnis frá rafbíl á Íslandi, frá framleiðslu að 220 þúsund km akstri, er 4 til 4,5 sinnum minni en frá bílum sem nota jarðefnaeldsneyti.
Minni mengun
Rafbílar eru ekki með mengandi útblástur og stuðla því að betri loftgæðum. Svifryksmengun hefur í för með sér auknar líkur á krabbameini, öndunarfærasjúkdómum o.fl. Hlutfall útblásturs frá bílum sem brenna jarðefnaeldneyti í mældu svifriki er um 30% á höfuðborgarsvæðinu. Þetta svifrik er með hátt hlutfall fínna agna (PM2,5), sem komast lengra inn í lungun og því enn hættulegri en stærri svifriksagnir.
Sífellt fleiri borgir stefna að því að banna mengandi bíla á næstu árum og áratugum.
Notkun innlendrar orku
Á Íslandi er allt rafmagn framleitt innanlands. Rafbílar eru því þjóðhagslega hagkvæmir samanborið við bíla sem brenna jarðefnaeldsneyti.
Gerðir rafbíla
Í dag eru í boði rafbílar sem sinna þörfum flestra. Mikil þróun er í rafbílum og sífellt fleiri tegundir og gerðir líta dagsins ljós.
Nýjasta tækni
Rafbílar eru tæknivæddir og margir hafa farsímaforrit (e. app) sem veita upplýsingar um ökutækið og gefa möguleika á stjórna ýmsum þáttum. T.d. að hita bílinn þegar kalt er í veðri, læsa hurðum og fylgjast með hleðslu og orkunotkun.
Minni rekstrarkostnaður
Bensín- og díselvélar eru flóknar með fjölda hreyfanlegra hluta, rafknúin ökutæki hafa hins vegar mun færri hreyfanlega hluti. Með færri hreyfanlegum hlutum minnkar viðhald og sparnaður eykst. Rafbílar nýta orkuna u.þ.b. 5 sinnum betur en bensín- og díselbílar. Hægt er að bera saman rekstrarkostnað rafbíls og bíls sem knúinn er jarðefnaeldsneyti á vef Orkuseturs.